Келесі жылдан бастап жәрдемақы тағайындау кезінде адамның әлеу­меттік санатына ғана емес, мемле­кеттік көмекке қаншалықты мұқтаж екеніне де басымдық беріледі.

Үкімет басшысы О.Бектеновтің айтуынша: бүгінде көпбалалы отбасы кедей болсын, бай болсын, мемле­кеттен бірдей қолдау алады. Біздіңше, бұлай болғаны әділетсіз. Бай, ауқатты және өзін-өзі асырай алатын адамдар мемлекеттен көмек алмауы керек. Олар өз күшіне сенуі қажет. Ал мемлекет тек өзін-өзі асырай алмайтын адамдарды қолдауы керек және қолдай береді.

Сондай-ақ, мемлекеттік көмекті өмір бойы берілуге тиіс төлем ретінде қарастыру дұрыс емес. Бұл – адамның жағдайын жақсартуына берілетін мүмкіндік. Сондықтан азамат жұмыс тауып, уақыт өте келе әлеуметтік көмекке мұқтаж адамдар қатарынан шығуға ұмтылуы керек.

Бүгінде әрбір отбасының әлеумет­тік-экономикалық жағдайы отбасы­ның цифрлық картасы негізінде анықталады.

Отбасының цифрлық картасы мемлекеттік деректер базаларынан мәлімет жинап, отбасының жағдайын бірнеше бағыт бойынша бағалайды. Шамамен 51 белгі бар. Соның ішін­де жұмыспен қамту, табыс, жылжи­тын және жылжымайтын мүлік, кредитердің бар-жоғы, білім деңгейі және тағы басқа мәліметтер бар. Осылайша, жүйе бәрін талдап, адамның және отбасының әлеуметтік санатын анықтайды, – дейді министр Ертаев.

Бұдан былай отбасының немесе адамның әлеуметтік санаты емес, мұқтаждық тобы болады.

А тобы – жоғары деңгей;

В тобы – ауқатты деңгей;

С тобы – қанағаттанарлық деңгей;

D тобы – экономикалық осал деңгей;

Е тобы – экономикалық және әлеуметтік осал деңгей.

«А» және «В» тобына кіргендерге жәрдемақы берілмейді. Әрбір отбасының әлеуметтік-экономикалық тобы ай сайын тексеріледі. «В» тобына кіретіндер белгілі бір себептермен «С»-ға түсіп кетсе, автоматты түрде жәрдемақы тағайындалады.

Заң бойынша 2027 жылы 1 қаң­тардан бастап екінші деңгейлі банктер жәрдемақы алушы және оның отбасы мүшелерінің келісімімен банк шоттары мен депозиттер бойын­ша ақпаратты да ұсынады. Соның аясында отбасының табысы мен кірісі ескеріледі екен.