Облыс әкімі Нұрлыбек Нәлібаев кадрлық өзгерістерге орай өткен актив отырысында облыстық мәдениет, архивтер және құжаттама басқармасының жаңа басшысы Жанмұрат Сейіловті таныстырды.
Жанмұрат Жақсымұратұлы 1985 жылы Жамбыл облысы, Қаратау қаласында дүниеге келген. Мұхаммед Хайдар Дулати атындағы Тараз мемлекеттік университетінде «тарих, құқық және экономика негіздері», Қожа Ахмет Яссауи атындағы Халықаралық қазақ түрік университетінде «мемлекеттік және жергілікті басқару» мамандықтары бойынша білім алған.
Еңбек жолын Қызылорда облысы әкімі аппаратының инспекторы ретінде бастаған. Әр жылдары Қызылорда қаласының кәсіпкерлік, өнеркәсіп және туризм бөлімінің басшысы, қалалық мәслихаттың, қала әкімі аппаратының басшысы, Қызылорда қаласы әкімінің орынбасары, Қызылорда облысының дене шынықтыру, спорт және туризм басқармасының басшысы лауазымдарында қызмет еткен. 2024 жылдың қыркүйек айынан осы күнге дейін Қызылорда облысы әкімі аппараты басшысының орынбасары лауазымын абыроймен атқарып келді.
Облыс әкімі жаңа басшыға өңірдегі тарихи-мәдени мұраларды сақтау жұмысын ұйымдастыруды, тарихи, ұлттық және мәдени дәстүрлерді дамытуды жүктеді. Халық шығармашылығы, театр, кино өнері, музей жұмысын үйлестіруді, кітапханаларды ақпараттандыру орталығына айналдыруды тапсырды.
Басшыға аманат
ҚР Мәдениет Қайраткері, белгілі жыршы Б.Саймағанбетов:
ӨЗІҢДЕЙ АЗАМАТТЫҢ ТІЗГІН ҰСТАУЫ – ҮЛКЕН ҮМІТТІҢ БАСТАУЫ
Сырдың мәдениеті мен өнеріне басшылық қызметке келгенің құтты болсын, Жанмұрат інім!
Бұл – үлкен жауапкершілік, ұлттың рухани болмысына, тарихи жадқа қызмет етудің биік сатысы. Сыр өңірінің мәдениеті – жай ғана аймақтық құндылық емес, бұл – бүкіл түркінің, күллі адамзаттың ортақ мұрасы.
Сонау Сақтар мен Массагеттердің жауынгерлік рухы мен дүниетанымынан, Оғыздардың ұлы өркениетінен, Ғұндардың қайсарлығынан нәр алған бұл мәдениет ғасырлар бойы үзілмей жалғасып келеді. Қорқыт атадан қалған қобыз сарыны, Ұлы Жібек жолының бойындағы қалалардан тараған өркениет сәулесі – осы өңірдің тарихи-мәдени өзегін құрайды.
Сыр бойы – сөз өнерінің, ән мен жырдың, терме мен толғаудың алтын бесігі. Аймақтан шыққан жыраулар мен ақындар, өнер мен ғылымның тарландары – ұлт руханиятының алтын қазынасы. Енді осы ұлы дәстүрге жаңаша тыныс беріп, рухани жаңғыруға үлес қосатын сендей азаматтың тізгін ұстауы – үлкен үміттің бастауы.
Ісіңе сәттілік, жолың ашық болсын!
Тарихтың тереңінен тамыр тартқан Сыр мәдениетіне жаңа леп әкеліп, жаңғыру мен жаңаруға қадам басасың деп сенемін!
(Facebook парақшасынан)