Соңғы жылдары еліміздің саясат сахнасында біршама “саяси” өзгерістер орын алғаны белгілі. Жақында Құрыл­тай құрылып, депутаттар да жұмыстың талабы мен тәртібін қаперге алып, ел бойынша түрлі мәселелерді көте­ріп, қоғамдық-саяси, әлеуметтік-эконо­мика­лық проблемалар турасында бел­сен­ділік танытуда.  Пре­зиденттің бастамасымен елдің саясат сипа­тындағы өзгерістердің қатарында Құрылтай ғана емес, Қазақстан Халық Кеңесі де бар.

Қазақстан Халық Кеңесі — Қазақ­стан Республикасы халқының мүд­де­сін білдіретін жоғары консульта­тив­тік орган ретінде белгіленді. Жалпы айтқан­да, Халық Кеңесінің құрамын­дағылар қоғамдағы түрлі пікірлерді жинақтап, халықты толғандырған сауалдарды пысықтап, талқылай отыра мемлекетке ұсыныстар ретінде жинақтап жеткізеді. “Халық Кеңесінің” заң бойынша негізгі міндеттеріне – елдің ішкі саясаты бойын­ша жалпыұлттық диалог ұйымдастыру, қоғамдық келісім мен ұлттық бірлікті нығайту,жалпыұлттық құндылықтарды ілгерілету, азаматтық қоғам мен мем­лекеттік органдар арасындағы байла­нысты күшейту кіреді.

Қазақстан Халық Кеңесі Құрылтайға заң жобасын ұсынады және Құрылтай заң жобасын қарайды.Мысалы, Халық Кеңесі қоғамдағы белгілі бір мәселені талқылап, соған байланысты жаңа заң жобасын әзірлесе, оны Құрылтайға енгізе алады. Заңды қабылдау құзыреті Құрылтайға тиесілі. Одан бөлек рес­пуб­ликалық референдум өткізу туралы бастама көтеріп, мемлекеттік орган­дармен және азаматтық қоғаммен жұмыс істейді, қоғамдық тыңдаулар, консуль­тациялар, конференциялар және басқа диалог алаңдарын ұйым­дастырып, белгілі бір мәселелер бойын­ша қоғамдық бақылауға қатыса алады.

Аймақ үшін маңыздысы, Қызыл­орда облысынан Қазақстан Халық Кеңесіне 3 адам мүшелікке енді

Осы орайда, Президент Қасым-Жомарт Тоқаев Қазақстан Халық Кеңе­сінің бірінші сессиясына қатысып, Қазақстан Халық Кеңесінің Төрағасы лауазымына Ерлан Қошановтың кандидатурасын ұсынды.

– Бұл – конституциялық мәртебесі бар беделді қызмет. Сондықтан бұл лауазымға елге белгілі, халық пен билік арасындағы байланысты қам­та­масыз ете алатын адам келуі керек деп санаймын. Осыны ескере отырып, Ерлан Жақанұлы Қошанов­тың кандидатурасын ұсынамын.Бұл адамды бәріңіз жақсы білесіздер. Ол – білікті, әрі тәжірибелі маман. Ұзақ жылдар бойы мемлекеттік қыз­мет жүйесінде еңбек етіп, өз мін­детін абыроймен атқарды. Мәжі­ліс төрағасы ретінде ауқымды рефор­маларды жүзеге асыруға атсалыс­қан белсенді саясаткер болды. Енді Халық Кеңесінің төрағасы ретінде де табысты жұмыс істеп, қоғамдық келісімді нығайтуға үлес қосатынына күмәнім жоқ, – деді Мемлекет басшысы.

Нәтижесінде, Қазақстан Халық Кеңе­сінің бірінші сессиясында дауыс беру қорытындысы бойынша Ерлан Қошанов Қазақстан Халық Кеңесінің Төрағасы болып сайланды.

Сондай-ақ Президент Қасым-Жомарт Тоқаев Қазақстан Халық Ке­ңе­сінің 126 мүшеден тұратын нақты құрамын Жарлықпен бекітті. Халық кеңесінің құрамын этномәдени бірлес­тік­тердің, қоғамдық бірлестіктер мен ком­мерциялық емес ұйымдардың, сон­­дай-ақ мәслихаттар мен қоғамдық кеңес­тердің мүшелері, қоғам қайрат­кер­лері, кәсіпкерлер, ғалымдар мен сарапшылар, мәдениет, білім, спорт және басқа да салалардың өкілдері біріктіреді.

– Олардың қатарында жұрт­шы­лыққа белгілі тәжірибелі тұлға­лар, мемлекет және қоғам қайрат­кер­лері, кәсіпкерлер мен көпте­ген белсенді азаматтар бар. Құрылтай­дың алғашқы отырысында айтып өткенімдей, ауқымды реформалар­дың арқасында мемлекеттік басқару ісіне жаңа, жасампаз, озық ойлы азаматтардың келуіне жол ашылды. Ел мүддесі үшін адал қызмет ету – зор мәртебе әрі қастерлі парыз. Осы орайда, Сіздерге – Халық Кеңе­сінің әрбір мүшесіне ерекше жауап­кершілік жүктеліп отыр. Сіздер ел игілігі үшін табанды еңбек етіп, мемлекеттігімізді нығайтуға зор үлес қосасыздар деп сенемін. Ырысты ынтымағымызды, қоғамдық келі­сімді күшейту үшін белсенді түрде еңбек етесіздер деп ойлаймын, – деді Қасым-Жомарт Тоқаев.

Президент Тоқаевтың айтуын­ша, Ассамблеяға тиесілі кей міндеттемелер енді Қазақстан Халық Кеңесіне жүктеледі. Айта кету керек, «Қазақстан халқы Ассамблеясы туралы» заңның күші жойылып, жаңа «Қазақстан Халық Кеңесі туралы» Конституциялық заң күшіне енді.Бұл жай ғана Ассам­блеяның атауын өзгерту емес, жаңа конституциялық нұсқа болып табылады.

А.Әлиарыстан