АСҚАРБЕК АЙНАЛЫП «ҚАЗЫҒЫН» ТАПТЫ, НЕМЕСЕ ОНЫҢ «ОБЛОНО» БОЛУЫНА НЕГІЗ ҚАНДАЙ?…
Ұлағатты ұстаздар қауымына жақсы жаңалық. 3 айға жуық басшысыз болған білім басқармасына жаңа басшы келді. Облыс әкімінің өкімімен Қызылорда облысы білім басқармасы басшысы лауазымына Асқарбек Есжанов тағайындалды. Актив отырысында жаңа басшыны облыс әкімі таныстырып өтті.
– Асқарбек Темірбекұлы барлығыңызға жақсы таныс. Мемлекеттік қызметтің барлық сатысынан өткен, білім-білігі жоғары, әлеуеті зор кадр. Түрлі салаларда жинаған мол тәжірибесімен, ұйымдастырушылық қабілетімен ел дамуы жолында аянбай еңбек ететін мықты маман, тегеурінді басшы ретінде өзін көрсете білді. Бұған дейін де осы салада еңбек етіп, мол тәжірибе жинаған маман ретінде күрделі де, жауапты жұмыста жоғары нәтижелер мен көрсеткіштерге қол жеткізеді деп сенім білдіреміз», – деді аймақ басшысы.
«Ат айналып қазығын табады» демекші Асқарбек Темірбекұлы білім саласында да абыройлы қызмет атқарғанын айта кету керек. Бұған дейін біраз лауазымды қызметтерді атқарған Асқарбек Есжанов бұл саладан алыс емес деген сөз. 1999-і жылы Қорқыт ата атындағы Қызылорда мемлекеттік университетін «тарих және құқық пәнінің мұғалімі» мамандығы бойынша бітірген. Өз қызметін Қызылорда экология және құқық колледжінің оқытушысы болып бастаған. Әр жылдары облыстық мәдениет басқармасында, облыстық білім департаменті мен соттар әкімшісінде түрлі жауапты лауазымдарда қызмет атқарған. 2007-2010 жылдары Қызылорда қалалық білім беру бөлімі бастығының орынбасары болғанын, 2015-2020 жылдары Қызылорда қалалық білім бөлімін басқарғанын айта кеткен жөн болар. А. Есжановтың өмір тарихында: қала әкімінің орынбасары, облыстық мәдениет, архивтер және құжаттама басқармасының басшысы секілді басқа да қызметтерді атқарғаны белгілі. Соңғы атқарған лауазымды қызметі Жалағаш ауданының әкімі. Жалпы 1,5 жыл Жалағаш ауданын әкім болып жақсы басқарды. Тіпті аудан көрсеткіштерін облыста көшбасшы деңгейіне жеткізді. Әкім лауазымын абыроймен атқарып, елдің батасын алып кетті десек артық болмайды. Жалағаш ауданына қарасты барлық ауылдардың әл-ауқатымен танысып, мәселелерді жіті бақылауында ұстады.
Білім басшысы болғанына 1 аптадай уақыт өтті. Асқарбек Есжанов өз жұмысына тыңғылықты кірісіп кеткенін байқадық. Облыстық білім басқармасының әлеуметтік желідегі парақшасына қарасақ, білім басшысы Жаңақорған ауданында болып, аудан бойынша білім бөлімі басшысының міндетін атқарушыны тағайындап кетті. Сонымен қатар аудан әкімінің қатысуымен және білім беру ұйымдарының басшыларымен кездесті. Тіпті жаңа қызметтегі өзінің орынбасарын тағайындап та үлгерді. Мемлекет басшысы «Міндет- жеті түрлі ілім білетін ұрпақ тәрбиелеу» деген болатын. Ендеше оның ұрпақ тәрбиелеу жолындағы бастамаларына тек қана сәттілік тілейміз!
НӘЛІБАЕВТАН КЕЙІНГІ ЖАС ӘКІМ?..
Айта кету керек Асқарбек Есжановтың орнына облыс әкімінің өкімімен Жалағаш ауданының әкімі лауазымына Ардақ Ибраимов тағайындалды. Жалпы есімі көпшілікке таныс емес болуы мүмкін. Қысқаша айта кетсек: 1986 жылы дүниеге келген. Әр жылдары мұнай және құрылыс компанияларында басшылық қызмет атқарды. 2020-2022 жылдар аралығында қалаға қарасты Белкөл кентінің әкімі болды. Әкім лауазымына дейінгі атқарған жұмысы облыс әкімі аппараты басшысының орынбасары. 8 айға жуық уақыт облыс әкімі аппарат басшысының орынбасары лауазымында отырған ол жақсы жұмыс жасағаннан кейін, осындай абыройлы лауазымға тағайындалды деп есептейміз. 37 жасында аудан басқарып отырған Ардақ Ибраимов кезінде Шиелі ауданының әкімі болған Нұрлыбек Нәлібаевтан кейінгі жас әкім деп айтуға болады. Айта кету керек Нұрлыбек Нәлібаев Шиелі ауданының әкімі болып 32 жасында тағайындалған болатын. Аймақ басшысы аудандық актив отырысында «су жаңа» әкімді таныстырды. Өз сөзінде:
– Ардақ Әбдіғаппарұлы Мемлекет басшысының тапсырмалары мен алға қойған міндеттерді жоғарғы деңгейде жүзеге асырып, нәтижелі жұмыстар мен игі бастамаларды одан әрі дамытуда аянбай жұмыс жасайды деп сенемін. Биылғы жылдың қорытындысымен дамудың барлық макроэкономикалық көрсеткіштері бойынша оң параметрлерге қол жеткізуді тапсырамын. Инвестиция тарту, салық базасын ұлғайту, қоғамдық-саяси тұрақтылықты сақтау, жаңа жұмыс орындарын ашу және кәсіпкерлікті дамыту бойынша нақты жұмыстар жүргізу қажет. Кезінде бұл аудан «Күріш фабрикасы» атанған. Қазір де сол деңгейді жоғалтпай, ауыл шаруашылығы саласын дамыту жағынан алдыңғы қатардан көрініп келеді. Аймақтың әлеуметтік-экономикалық ахуалын жетік меңгерген маман ретінде ауданның осы ерекше потенциалын пайдалану керек, – деді Нұрлыбек Нәлібаев.
Тағайындалғанына 1 аптаға жуық уақыт болса да Ардақ Ибраимов ауданды аралауды бастап кетті. Айтпақшы сенбілікке шығып үлгергенін айту керек. Отын қоймаларды аралап, жылу маусымында қатты отын тапшылығын болдырмауды тиісті мамандарға тапсырды. Сонымен қатар Жалағаш кентінен жаңа құрылыс нысандарының салу жоспарларымен танысып, бірқатар білім беру ұйымдарын аралап шықты. Сондай-ақ Қаракеткен ауылдық округіндегі техникалық су ұңғымасын қазу жұмыстарымен танысты. «Орман шаруашылығы қызметкерлері күніне» орай бірнеше орман шаруашылығы қызметкерлерін марапаттады. «Су жаңа» әкімнің 1 аптадағы қызметі осындай. Қасым-Жомарт Тоқаев «Ауылдағы жағдайды жақсарта алмасақ-бәрімізге сын» деген болатын. Сондықтан да Асқарбек Есжанов атқарып кеткен жұмысты Ардақ Ибраимов абыроймен атқаруына тілектеспіз.
Мұхаммедшах Каюп