(Сурет ғаламтор желісінен алынған)
Павлодар облысында 12 жастағы оқушы қыз зорланған соң жүкті болып, дүниеге сәби әкелді. Басты күдікті оның туысы болып шықты. Оқиғаның бәрі өңірдегі Шарбақты ауданында болды. Қыздың жүктілігі туралы бірінші болып мұғалімдер білген. Мұғалімдер оқушы қыздың бойындағы өзгерісті байқап, ата-анасына хабарлаған.
Мәліметтерге сенсек, жасөспірімді зорлады деп оның туысы, жергілікті колледж студенті күдікке ілінді. Мектеп оқушысы қазір өзін жақсы сезініп, қызды дүниеге әкелді. Шенеуніктер баланың мектепті ойдағыдай бітіруі үшін барлық шараны қолдануға уәде берді.
– «Жүктілік фактісін мектеп әкімшілігі оқушы көктемгі каникулдан оралғаннан кейін анықтады. Содан кейін ақпарат тиісті органдарға берілді. Бойжеткен мен оның анасы дереу ауруханаға жеткізілді. Науқас облыстық перинаталдық орталыққа 19 шілдеде түсіп, 20-сы күні босанған. Ана мен баланың жағдайы қанағаттанарлық деп бағаланып отыр. Қазір Шарбақты ауданының ішкі істер органдары тергеу амалдарын жүргізіп жатыр», – деді Павлодар облысының білім басқармасы.
Оқушы қыздың өзі атаулы әлеуметтік көмек алатын көпбалалы және аз қамтылған отбасынан шыққан. Әкімдік қыздың әкесіне жұмысқа орналасуға да көмектесті. Ол қазір Галкин атындағы мектепте от жағушы болып жұмыс істейді. Кәмелетке толмаған баланы зорлау дерегі бойынша Қылмыстық кодекстің 120-бабының 4-бөлігі (Бірнеше рет зорлау) бойынша сотқа дейінгі тергеу амалдары жүргізіліп жатыр. Күдікті өмір бойына бас бостандығынан айырылуы мүмкін.
Осы кезде әлеуметтік желілерде мектеп директорының жұмыстан босатылғаны туралы ақпарат пайда болды. Аудандық білім бөлімі бұл деректі растамады.
– «Факті анықталғаннан кейін директор жұмыста болды. Ішкі тексеру болды. Содан кейін ол уақытша еңбекке жарамсыз демалысына кетті. Еңбекке жарамсыздық парағы шыққан соң өз еркімен арыз жазды», – деп түсіндірді аудандық білім бөлімінің басшысы Маралбек Итемгенов.
Бұл – биыл Шарбақты ауданында жасөспірімдердің жүкті болуының екінші оқиғасы. Қазір екі деректі де полиция жіті бақылап жатыр.
Өңірдің білім беру басқармасы жағдайды растады. Мектеп оқушысы зорланған соң жүкті болып қалған. Балалар омбудсмені Динара Зәкиеваның айтуынша, кәмелет жасына толмаған балаға зорлық-зомбылық көрсету фактісі бойынша тергеу жүріп жатыр. Жаңа туған нәресте қазір анасының қасында.