Қызылорда облысы кәсіпкерлер палатасының алаңында Кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңестің кезекті отырысы өтті. Жиынға Қазақстан Республикасы Мемлекеттік қызмет істері агенттігінің Қызылорда облысы бойынша департаменті басшысының орынбасары Н. Сүлейменов қатысты.
Кездесу барысында қала аумағындағы кәсіпкерлік нысандар маңында орнатылған жол белгілері мен жол таңбаларына байланысты туындаған мәселелер қаралды. Аталған жағдайлар кәсіпкерлік субъектілерінің қызметіне әсер етіп отырған кедергілер ретінде көтеріліп, олардың ықпалы мен шешу жолдары жан-жақты талқыланды.
Сонымен қатар, сыбайлас жемқорлық тәуекелдерін алдын алу және кәсіпкерлік ортада ашықтық пен адалдық қағидаттарын қамтамасыз ету мәселелеріне де назар аударылды. Қатысушылар тарапынан ықтимал тәуекелдерді дер кезінде анықтау және оларды болдырмау бағытындағы шаралардың маңыздылығы атап өтілді.
Жиын қорытындысында уәкілетті мемлекеттік органдарға аталған мәселелер бойынша қосымша зерделеу жұмыстарын жүргізу және жол инфрақұрылымының кәсіпкерлік субъектілерінің қызметіне тигізетін әсерін кешенді түрде қарастыру жөнінде ұсыныстар берілді.