Жұлдызды қалашықта Кеңес дәуірінен сыр шертетін орындар аз емес. КСРО заманында Ұлы көсеміміз деп санамызға сіңірген Лениннің ескерт­кіші әлі күнге дейін осы жұлдызды қалашық­тың орталық алаңында тұрғанын көпшілік біле бермейді.

Негізінен ғарышты аймақтың орталық алаңы­ның  жолдары жабырқау тартып, сұрықсыз күйде тұр.  Сонау кеңес кезеңінде төселген тас жол сол күйі жатыр. Жергілікті жұртшылық Ресей меншігіндегі алаңға әлі күнге дейін жөндеу жұмыс­тары жүргізілмегенін алға тартты. Ал Қазақстан тара­пынан оны қайта жаңғыртуға рұқсат етілмейді.

Орталық алаңдағы Лениннің еңселі тас мү­сіні алыстан менмұн­далап, ерек­ше көзге түседі. Кеңестік заманда кез-келген қала пен ауылдардан табы­латын мұндай ескерткішті бүгінде си­рек те болса кезіктіру мүмкін емес. Тіпті Ресейдің кей­бір қалаларында да коммунистердің мүсінін әлде­қашан тұ­ғырдан түсіргені белгілі. Ал әзірге жұл­дызды қалашықта ғана Лениннің мүсіні өз маңыздылығын жоймаған секілді.

Сондай-ақ, бір кездері Гагариннің ғарыш кеңіс­тігіне самғаған Союз зымыранының түпнұсқасы да осы Байқоңыр қаласының орталық көшесіне қойылыпты. Алайда еліміз үшін маңыздылығы жоғары ескерткіштерді Байқоңырдан кезіктіру оңай болмады. 

Алақандай ғана аумақта Ұлы Абайдың шағын ғана бюсті тұр. Бюсттің алдына кітап пішінді ескерткіш тақта орнатылып, оған ақынның өлеңі екі тілде жазылған. Осы жерде Лениннің тас мүсіні секілді қазақ ақынына да бір еңселі ескерткіштің бұйырмағаны ойлантады.

Алайда сол көшенің қиылысына ақынның үлкен бильборды ілініпті. Айналасы жасыл шөппен көмкерілген. Халықтың айтуынша, бильбордтың төңірегіне жаз мезгілінде қазақ жастары жиі шоғырланып, көк шөптің үстінде демалып отырады екен.

Ербақыт ЖАЛҒАСБАЕВ