Экономиканы көтерудің төте жолы – кәсіпкерлікті дамыту. Әсіресе, шағын бизнестің үлесін көбейту арқылы жаңа жұмыс орындарын құрып, халықтың табысын арттыруға мүмкіндік бар. Бұл ретте кәсіпкерлік саласының әлеуетін көтеру үшін биліктің бизнес өкілдерімен пікірлесуі өте маңызды.

Облыс әкімі Нұрлыбек Нәлібаев өңірдегі бизнес өкілдерімен кездесіп, ашық алаңда ортақ мәселелерді талқылады. Басқосуға «Атамекен» Ұлттық кәсіпкерлер палатасы басқарма төрағасының орынбасары Тимур Нақыпбеков және облыс прокуроры Нұрлан Бижанов пен салалық құрылым басшылары қатысты.

Жиында отандық өнім өндіру, азық-түлік қорын көбейту және жергілікті тауарөндірушілерді қолдау шаралары мен өңдеу салаларының дамуына жол ашатын, әрі кедергі болатын да жайлары айтылды.

Аймақ басшысы мұнай қорының сарқылуына байланысты газ өндіру көлемін арттыруға басымдық берілгенін, өндіріс орындарының жанынан ілеспе зауыттар ашу арқылы жаңа жұмыс орындары құрылатынын жеткізді. Сондай-ақ, инвестиция тартуға қолайлы жағдай жасау арқылы кәсіпкерлердің жаңа жобаларды жүзеге асыруға мүмкіндік мол екені де сөзсіз.

– Инвесторларды қолдау мақсатында «Байқоңыр» әлеуметтік кәсіпкерлік корпорациясының рөлі күшеюде. Оның құрамында «Қызылорда инвестициялық және талдау орталығын» ашып, инвестиция тартуға кең мүмкіндіктері мен қызметтік байланыстары бар ірі кәсіпкерлерді шақырамыз.

Алдағы уақытта агроөнеркәсіптік кешенді дамытуға басымдық береміз. Бұл бағытта бірінші кезде ауыл шаруашылығының өнімділігін арттырып, агроөнеркәсіп өнімдерін өңдеу және экспорт көлемін арттыруды қолға аламыз. Өнім өндіруге ынталы азаматтарды қолдаймыз.

Келер жылы экспортқа шығарылатын томат концентратын өндіретін зауыттың құрылысын бастаймыз. Ал, әртараптандыру бағытында шет елдерде сұранысы көп азықтық жүгеріні егу қолға алынады. «Ақжарма и К» шаруашылығы СПК-мен бірлесіп жүгері өсіруге қажетті технологияны енгізуге инвестор тартуда. Мұнан бөлек, агро-индустриялық зоналар ашу жоспарымызда бар,-деді аймақ басшысы Н.Нәлібаев.

Кәсіпкерлер палатасының ұсынысымен өткізілген жиында Тимур Нақыпбеков мұндай кездесулердің саладағы өзекті мәселелерді ашық талқылауға мүмкіндік беретінін атап өтті. – «Атамекеннің» бастамасымен осындай кездесулер барлық облыста ұйымдастырылып жатыр. Қызылорда – тоғызыншы өңір. Ал кәсіпкерлік мәселесімен айналысатын жұмыс тобын құрып отырған әзірге жалғыз облыс. Жергілікті мәселелерді әкімдік шешіп берсе, республикалық деңгейдегі проблемаларды Үкіметке біз жеткізіп отыратын боламыз», – деді Атамекен ҰКП Басқарма төрағасының орынбасары Тимур Нақыпбеков.

Келелі кездесуде облыс әкімі Нұрлыбек Нәлібаев шетелдік кәсіпкерлердің тәжірибесі мен инновацияларын енгізу басталғанын баса айтты. Мәселен, украиналық инвесторлармен тұкым шаруашылығын дамыта отырып күріш, бидай, жүгері, соя дақылдарының жаңа сорттарын шығаруда ынтымақтастық орнаса, австралиялық «Рубикон» компаниясының суды пайдалану тиімділігі тәжірибесі қолға алынған.

Жиында сөз алған облыстық кәсіпкерлік және өнеркәсіп басқармасының басшысы Мұса Қалдарбеков кәсіпкерлерді қолдауда әртүрлі көздерден 20 млрд. теңге шамасында қаржы қаралып, бүгінде 700-ден астам жобаға жеңілдікпен несие берілгенін баяндады. Ауылдағы кәсіпкерлерді қолдау үшін шағын несиелер беру бағытында кәсіпкерлердің 393 жобасы 6,1 млрд. теңгемен қаржыландырылған.

Басқосуда «Жан-Арай» ЖШС директоры Бақдәулет Махашов көтерметарату орталығының әлеуетін жоғарылату арқылы азық-түлік өнімдерінің бағасын тұрақтандыру жолдарын ұсынды. Ал «Ер-Әлі» шаруа қожалығының төрағасы Әліби Бекжанов егін шаруашылығын әртараптандыру туралы тәжірибесімен бөлісіп, бақша дақылдарын көбейту мәселесін көтерді.

Облыс әкімі азық-түлік өнімдерінің басым бөлігін сырттан әкелу тәуелділігінен арылу үшін бақша дақылдарын егуде жергілікті кәсіпкерлерді, ынталы бизнесмендерді әрдайым қолдайтынын ашық айтты.

– Көкөністердің біразын көрші аймақтардан алатынымыз жасырын емес. Картопты Павлодардан, сәбізді Қостанайдан әкелудеміз. Қалғаны Түркістан облысынан келеді. Егін егуге ынталы жергілікті шаруаларға жер бөлуді тапсырып, оларға жағдай жасадық. Бақша өнімдерін, көкөністі егуге біздің өңірдің мүмкіндігі жетеді. Қазірден-ақ істі ілгерілетіп әкеткен шаруалар да бар. Күрішке ғана иек артып қоюға болмайды. Артылса өнімді сатуға мүмкіндікті де қарастырамыз,-деді облыс әкімі Н.Нәлібаев.

Сондай-ақ, бірқатар кәсіпкерлер жаңа емхана ашу, бос тұрған ғимараттарды кәсіпкерлік мақсатта пайдалану, туризмді дамыту, жеке балабақшаларға субсидия бөлу, жеңіл өнеркәсіп саласына жағдай жасау сынды өзекті мәселелерді ортаға салды.

Жиын соңында аймақ басшысы өңірде бизнес климатты жақсарту үшін кәсіпкерлердің ұсыныстары мен жобаларын қарайтын арнайы жұмыс тобы құрылатынын жеткізді.

«Атамекен» Ұлттық кәсіпкерлер палатасы басқарма төрағасының орынбасары Тимур Нақыпбеков мұндай жұмысшы топтың алғаш Қызылорда өңірінде бастау алатыны қуантарлық жағдай екенін атап өтті.