Қызылорда облыстық сотында «Қылмыстық құқық және процесс, Әкімшілік құқық бұзушылық және процесс» секциялары бойынша семинар сабағы өткізілді.

Семинарға қылмыстық істер жөніндегі сот алқасының төрағасы Ж.Бекжанов, облыстық соттың судьялары, аудандық және оған теңестірілген соттардың судьялары қатысты.

Семинар сабағын алқа төрағасы ашып, қатысушыларды күн тәртібімен таныстырып, көтеріліп отырған тақырыптардың маңыздылығына тоқталды.

Қызылорда қалалық №2 сотының судьясы Ж.Жакеева «Экономикалық қызмет саласындағы қылмыстық құқық бұзушылықтарға қатысты істерді қараудың сот тәжірибесі» тақырыбында баяндама жасап, экономикалық қызмет саласындағы қылмыстық құқық бұзушылықтардың түрлері мен аталған санаттағы істерді қараудың ерекшеліктерін атап өтті.

Қызылорда қаласының әкімшілік құқық бұзушылықтар жөніндегі мамандандырылған сотының судьясы И.Тұңғышбаев көші-қон саласында заңнаманы қолдану мәселелерін атап өтіп, шетелдiктiң немесе азаматтығы жоқ адамның Қазақстан Республикасының көші-қон саласындағы заңнамасын бұзуына байланысты істердің сот практикасымен бөлісті.

Қызылорда қаласының әкімшілік құқық бұзушылықтар жөніндегі мамандандырылған сотының судьясы С.Утегенова салық мәселелеріне қатысты әкімшілік құқық бұзушылық туралы істер бойынша сот практикасы туралы баяндама жасап, бірқатар мәселелерді атап өтті.

Семинарды қорытындылаған алқа төрағасы Ж.Бекжанов істерді қарау барысында процестік нормаларды сақтау керектігін қатысушылардың назарына жеткізді.

Қызылорда облыстық сотының баспасөз қызметі