Қала күн сайын өзгеріп келеді. Әр алуан сәулет өнерімен айшықталған, әртүрлі стильмен жаңа дизайндағы құрылыстар көптеп салынуда. Мұның бәрі мүмкін еместей болып көрінгенімен, қазір қызылордалықтар басқа қалалықтарға таңданбайтын, тамсанбайтын болды. Әрі, бұрынғыдай қол босағанда серуендеп, тамашалайтын орындарды да аңсамайды. Бәрі, өзінде бар.

Балалар мен жасөс­пірім­дерге арналған шығарма­шылық иновациялық орталы­ғында заманауи талап­тар­ға сай бой көтерген бұл кешен бір мезетте 500 оқушы, тәулігіне 3 мың оқушыға дейін қабылдайды. Орталықта бас­сейн, топтық жаттығу бөл­месі, көркем гимнастика және фитнес залдары, үс­тел ойындарына ар­нал­ған кабинет, жек­пе­-жек және үстел тен­нисі залдары қарас­тырылған.

Ұлдар мен қыздарға арналған жеке-жеке киім ауыс­тыру бөлмелері бар. Көркемдік-эсте­ти­ка­­­лық бағытта кескін­де­ме, сурет салу, резин арт, балалар шығарма­шылығы шебер­­­­­ханасы, сәндік-қолданба­лы өнер, Fab­Lab, дыбыс жазу сту­диясы, робо­то­тех­ни­ка және жасанды интеллект, биотехнология, 3D модельдеу, КИП және авто­маттандыру, киберспорт және математика кабинеттері жұмыс істейді.

Қаланың СПМК-70 мөлтек ауданындағы 1500 орындық жаңа мектеп құрылысының бас мердігері “Integra Cons­truction KZ” серіктестігі құры­лыс-монтаж жұмыстарын аяқ­­тауға жақын. Ғимараттың қабырғалары толық қаланып, іші әрленуде, инженерлік жүйелері орнатылуда. Құры­лысқа 11 инженер-техникалық қызметкер, 183 жұмысшы және 6 техника жұмыл­дырылған.

Арай мөлтек ауда­нын­дағы 1500 орындық мектептің де құрылысы қарқын алған. Бас мердігер “Абу-Сер” се­рік­тестігі

ішкі әрлеу, есік-терезе орнату, жылу жүйелерін монтаждау және аулаға инженерлік желілерді тарту жұмыс­тарын атқаруда. Құры­лыс басында 10 инженер, 185 жұмысшы еңбек етуде, 22 техника іске қосылған. Мектеп тамыз айында пайдалануға беріледі деп жоспарлануда.

«Қызылорда Саз М» ЖШС жаңа кірпіш зауытын орналастыру үшін өңірлік үйлестіру кеңесінің шешімімен 7 гектар жер телімі бөлінген. Бүгінде зауыт пен әкімшілік-тұрмыстық ғимараттың құрылысы аяқталып, қажетті жабдықтар толық орнатылған.

Осы кезде өндірістік жабдықтар іске қосылып, зауыт техни­калық режимде жұмы­­­сын бас­тады. Аумақ­ты абат­тандыру, көгалдан­ды­­ру жұмыс­тары да жүргізілуде. Жақын күн­дері ашылу рәсімі өтеді.

Зауыттың басты ерекшелігі – өндіріс про­цесі толық автомат­тандырылған. Экология­лық жағынан да тиімді, яғни басқа кірпіш зауыттарындағыдай көмірмен күйдірмейді. Жаңа технологиялар өндірістің тиімділігін арттырып, өнім сапасын жоғары деңгейде сақтауға мүмкіндік береді. Жылына 90 миллион кірпіш өндіруге есептелген кәсіпорын толық іске қосылғанда 70 адамды тұрақты жұмыспен қамтиды.

Сол жағалаудан жаңа стадион құрылысында шығыс және батыс трибуналардың металл конструкциялары орна­тылып, қабырғалар, ішкі бөлмелер мен сыртқы витраждар қаланған. Қазіргі таңда футбол алаңын жабдықтау, ішкі әрлеу және аумақты абаттандыру жұмыстары жүргізілуде.

Өткен жылдан бері Өнеркәсіп және құрылыс министрлігі­мен бірлесіп, өңірлерде шағын өнеркәсіптік ай­мақтар құру үшін жүйелі жұмыс жүргі­зілуде. Биыл сол жағалаудағы «Тұмар» жеке кәсіпкерлігі мен «Техоснастка-Рем­сер­вис» ЖШС-нің база­сында шағын өнер­кәсіптік аймақ іске қосылмақ. Жобаның жал­пы құны – 1 млрд 52 млн теңге.

«Тұмар» ЖК құрылыс жұмыстарын толық аяқтап, 1,9 мың шаршы метр нысан аумағын абаттандыруда. Қазіргі таңда 682 шаршы метр аумаққа 7 жоба орналастырылуда. Атап айтқанда, сүт өнімдерін өндіретін шағын цех, кондитерлік өнімдер, нан-тоқаш бұйымдары мен жартылай фабрикаттар өндіретін екі цех іске қосылады.

«Техоснастка-Ремсервис» серіктестігі де құрылыс жұмыстарын толық аяқтаған. Жалпы ауданы – 1,9 мың шаршы метр.

Шағын өнеркәсіптік парк – жалға алушы кәсіпорындардың өндірістік қызметін жүзеге асыруына барлық жағдай жасалған арнайы аймақ. Мұнда қажетті инфрақұрылым, инженерлік желілер, өндірістік, қойма және әкімшілік ғимараттар толық қарастырылған.

Қаладағы Әбілқайыр хан көшесінен Саламатов көшесіне дейінгі жол құрылысының ұзындығы 2,9 шақырымды құрады. Бүгінгі күні 2,4 шақырым аумақта астыңғы қабатты тазалау және ашу жұмыстары аяқталып, 2 шақырым бөлікте тірек қабырғаларын құю жұмыс­тары жалғасуда. Жобаның мердігері – “Автомобиль жол басқармасы” ЖШС.