Жыл сайын дәстүрге айналған “Университет аруы” байқауы биыл да жоғары деңгейде өтті. Бұл шара тек сұлулық пен сәннің ғана емес, ақыл мен парасаттың, өнер мен білімнің тоғысқан алаңы. Қатысушылар өздерінің жан-жақты қырларын көрсетіп, ерекше өнерімен, эрудициясымен және сахналық шеберлігімен көзге түсті.
“БАЙҚАУ МЕН ҮШІН ҮЛКЕН МЕКТЕП БОЛДЫ”
Әбдіғали Назар
Бас жүлде иегері – Университет Аруы 2025
– Назар, жеңісіңізбен құттықтаймыз! Байқауға қатысу туралы шешімді қалай қабылдадыңыз?
– Көп рақмет! Мен бұл байқауға “Алтын күз – 2024” байқауында бас жүлде алып, тікелей жолдама жеңіп алған соң қатыстым. Осы сәттен бастап көптеген жаңа мүмкіндіктерге ие болдым. Соның бірі – талапкерлерді университетке шақыратын желінің “амбассадоры” атануым. Байқау маған өзімді жаңа қырымнан танытуға және сенімділігімді арттыруға үлкен мүмкіндік болды.
– Байқау барысында сіз үшін ең қиын болған сәттер қандай еді?
– Ең басты қиындық – уақытты тиімді басқару болды. Сабақ, дайындық және жеке өмір арасында тепе-теңдік сақтауға тырыстым. Сонымен қатар сахнада өзімді еркін сезіну, қобалжуды жеңу де біраз еңбекті қажет етті. Бірақ бұл қиындықтар маған үлкен тәжірибе сыйлап, өзімді жетілдіруге көмектесті.
– “Университет аруы” қандай қасиеттерге ие болуы керек деп ойлайсыз?
– Бұл тек сұлулықпен ғана өлшенбейді. Ол ең алдымен ақыл парасатты, өзіндік көзқарасы бар, жан-жақты дамыған, өз ортасына позитивті әсер ете алатын тұлға болуы керек. Сондай-ақ, өзіне деген сенімділік, әдептілік және сымбаттылық та маңызды рөл атқарады деп ойлаймын.
– Бұл жеңіс сіздің болашақ жоспарларыңызға қалай әсер етті?
– Бұл жеңіс маған үлкен серпін берді. Байқау барысында алған тәжірибем болашақта жаңа белестерді бағындыруға көмектеседі деп сенемін. Сондай-ақ, бұл менің өзіме деген сенімділігімді одан әрі арттырып, жаңа мүмкіндіктерге жол ашты.
– Университет жастарына қандай кеңес берер едіңіз?
– Өздеріңізге сенімді болыңыздар және кез келген мүмкіндікті пайдалануға тырысыңыздар. Қорқыныш пен күмәнге берілмеңіздер, ең бастысы – өзіңізді дамыту, еңбектену және өз-өзіңізді сүю. Сонда ғана сіз кез келген қиындықты еңсеріп, мақсатыңызға жете аласыз!
“Университет аруы – 2025” байқауы – талантты, ақылды, көркем арулардың басын қосатын ерекше жоба. Бұл сайыс тек сұлулықты емес, жан-жақты дамуды, білім мен өнерді бағалайтын алаң екенін тағы да дәлелдеді.
Біз барлық жеңімпаздарды шын жүректен құттықтаймыз! Алдағы уақытта оларды жаңа белестер, үлкен мүмкіндіктер күтіп тұрғанына сенеміз.
Биылғы байқау ерекше тартысты өтті. Әрбір ару өзіндік даралығымен ерекшеленіп, көрермендерді тамсандырды. Жарыс барысында олардың тек сыртқы сұлулығы ғана емес, интеллектісі, көшбасшылық қасиеттері мен шығармашылық қабілеттері сыналды.
Нурмашева Аяжан
I-ші вице мисс
“Университет аруы – 2025” байқауы бірнеше кезеңнен тұрды:
Таныстыру кезеңінде қатысушылар өздерін ерекше стильде таныстырып, жеке тұлғалық ерекшеліктерін көрсетті.
Шығармашылық өнер көрсету кезеңінде арулар би билеп, ән айтып, сахналық қойылымдар арқылы өздерінің ерекше қабілеттерін паш етті.
Зияткерлік сайыс кезеңінде логикалық сұрақтар қойылып, қатысушылардың білім деңгейі мен ойлау қабілеті сыналды.
Прокопчук Ангелина
II-ші вице мисс
Сән көрсетілімі кезеңінде қатысушылар сахнада өздерін сенімді ұстап, сән үлгілерін көрсетті. Әр кезеңде арулар тек көркімен ғана емес, өзіндік харизмасымен, дарынымен және білім деңгейімен ерекшеленді.
Байқаудың әділдігін қамтамасыз еткен қазылар алқасының құрамында:
Мәдениет саласының үздігі, “Шапағат” медалінің иегері Орынкүл Балтабайқызы. “Қазақ аруы – 2013” байқауының жеңімпазы Айгерім Қанатбаева. “Университет аруы – 2022” жеңімпазы Карл Нұрай. Әлеуметтік және тәрбие жұмыстары басқармасының басшысы Жанар Бимұратқызы. Жас кәсіпкер, UMMA Coffee желісінің негізін қалаушы Дәрібай Рахат болды. Қазылар әр қатысушының өзіндік стиліне, сахнадағы үйлесімділігіне және интеллектуалдық деңгейіне ерекше назар аударды.
Жақсылықова Анеля
III-ші вице мисс
Жүлделі орын иегерлері
Байқаудың бас жүлдесін Әбдіғали Назар (ҚТӘ-24-1 оқу тобы, Гуманитарлық педагогика институтының 1-курс студенті, 5-жатақхана атынан қатысушы) жеңіп алды. Ол өзіне тән сымбаттылығы, ақылдылығы, сахнадағы сенімділігі арқылы көпшілікті баурап алды.
І вице-мисс Гуманитарлық педагогика институт студенты Нурмашева Аяжан, ІІ вице-мисс Педагогика және дәстүрлі өнер институты, ДиЛМАШ жатақханасы атынан қатысушы Прокопчук Ангелина, ІІІ вице-мисс Жаратылыстану институтының студенті Жақсылықова Анеля. Сондай-ақ, ерекше номинациялардың бірі “Көрермен көзайымы – 2025” атағы Гуманитарлық педагогика институтының студенті Абылай Аружанға берілді.
Көрермен көзайымы-2025
Айта кететін жайт байқау барысында Прокопчук Ангелина “Сыр аруы – 2025” республикалық байқауына жолдама жеңіп алды. Бұл оның университет атынан үлкен сахнада бақ сынайтынын білдіреді.
Қазына ҚҰЛМЫШОВА