QAA.kz

"Ақмешіт ақшамы" газеті

Жазасын өтегендер жарысқа қатысты

Автор:QAA.kz

Май 24, 2019

Қаламызда орналасқан пробация үйінде өткен аптаның жұма күні Қазақстан Республи­касы түзеу мекемелерінен босатылған және жазасын өтеп шыққан азаматтар мен проба­циялық есепте тұрғандар, өмір­лік қиын жағдайда қалған адамдарды қайта әлеуметтен­діруге арналған орталықтың азаматтары арасында волейбол­дан жарыс өтті.

Бүгінде елімізде тура жолдан адасып шалыс басқандар мен қаса­қана қылмыс жасап жазасын өтеп келгендер қаншама. Әрине, жазасын өтегеннен кейінгі қоғамның оларға деген көзқарасының өзгерері анық. Осындайдан кейін әр адам әртүрлі жағдайға тап болады. «Жаңылмайтын жақ, сүрінбейтін тұяқ жоқ» демекші, оларға осындай сәттерінде көмек қолын созар «Пробация үйінің» бол­ғаны үлкен көмек. Қазіргі таңда, барлық өңірлерде пробация үйі бар. Олардың негізгі мақсаты – қылмыс жасап жаза­сын өтеп келген адамдардың қайтадан қылмыс жасауының алдын-алу, өмірлік түрлі қиын жағдайларға тап болған­дарға көмек көрсету және бас бостан­дығынан айыру орындарынан босатыл­ғандардың қоғамға бейімделуіне жағдай жасау. Егерде оларға көмектер көрсетілетін болса, еркін өмірге деген құштарлығы артып, қоршаған ортаға сіңісіп кетуі оңайырақ болар еді. Осыған орай, қаламыздағы «Пробация үйінің» спорт залында «Салауатты өмір салтын насихаттау» бойынша волейболдан жарыс өткен болатын.

2017-2019 жылдарға арналған кешенді стратегияны жүзеге асыру мақсатында ұйымдастырылған жарыс­қа барлығы 3 команда қатысты. Олар: қылмыстық жазасын өтеп шыққандар­дан «Жеңіс», өмірлік қиын жағдайға қалған адамдарды қайта әлеуметтен­діруге арналған орталығында қызмет алушылардан «Тасбөгет», пробация қызметінде есепте тұрған азамат­тардан құралған «Пробация» коман­далары.

— Қылмыстық жазасын өтеген адам­дарды әлеуметтік бейімдеу мен оңалту орталығына биылғы жылдың 1-тоқ­санында 174 азаматтың әлеуметтік картасы толтырылды және олардың әрқайсымен жекелей сөйлестік. Бүгінгі жарыс «қылмыстық жазасын өтеген адамдарды әлеуметтік бейімдеу мен оңалту орталығы» коммуналдық мемлекеттік мекемесінің маман­дарымен ұйымдастырылып отыр. Жеңімпаздар ақшалай сыйлықтармен және арнайы дипломдармен мара­патталады, — дейді орталықтың психолог маманы Тұрсын Налибаев.

Биыл түзеу мекемесіне көптеген түрлі хабарламалар келіп түскен. Соның негізінде орталық 62 азаматттың үйіне барып, олардың тұрмыстық жағдай­ларын көрген. Сонымен қатар, жұмысқа мұқтаж болып отырған азаматтарды жұмысқа орналастырып, құжаты жоқтарға құжаттарын алып беруге, тұрғылықты мекен-жайына тіркеле алмай жүргендерге тұрып жатқан орны бойынша сол мекен-жайға тіркеп беру секілді көмектер көрсеткен.

Жазасын толық өтеп шыққан және пробация қызметінің есебінде тұрған азаматтарды қоршаған ортаға бейім­деу мен өмірге деген көзқарастарын жақсар­туды көздеген жарыстың қорытындысы бойынша жүлделі І орынды «Жеңіс» командасы иемденді. Жеңіске деген ерекше құлшынысымен ІІ орынды «Тасбөгет» командасы алса, «Пробация» командасы ІІІ орынды иеленді.

Қоғамнан тысқары қалып, өмірге деген құштарлық пен қамқорлықты аңсайтын азаматтарға «Пробация үйінің» алдағы уақытта да оларды барынша қоршаған ортаға бейімдейді деген сенімдеміз.

Т.КЕНЖЕБАЕВА

QAA.kz

QAA.kz - "Ақмешіт ақшамы" газеті. Қазақстан және Қызылорда жаңалықтары.

Добавить комментарий

Ваш адрес email не будет опубликован. Обязательные поля помечены *