QAA.KZ

Сарқылмасын Сыр-Ана!

ӨТКЕНІ мен БҮГІНІН ҰШТАСТЫРҒАН БІЛІМ ОРДАСЫ

ByQAA.kz

Сәу 22, 2019

Сәуірдің шуақты күнінде, сәрсенбінің сәтінде қала орталы­ғындағы №3 мектеп-лицейі байыр­ғы атауы «Үшінші гимназия» «баяғы Ворошилов мектебі» 80 жылдық мерейтойын атап өтті. Мектеп мерейтойына ғұмырының талай жылдарын мектеп қабыр­ғасында өткізіп, білім мен өмірден түйген ізгі тәжірибесін шәкірт санасына дарытуға ыждаһатпен еңбек еткен ұлағатты ардагер ұстаздар, ондаған жылдар белесін­де ыстық ұядан түлеп ұшқан шәкірттер, тілектес әріптестер жүздеп ағылып келіп, риясыз сезім толқыныстарымен тоғысып жатты. Мектеп қабырғасында өткен кездесу сәтінде құрметті қонақтар бүгінде облыс орталығындағы бірден-бір ІТ мектеп аталған мектеп-лицейдің жетістіктерін паш ететін ІТ сыныптармен танысып, мектептің қазыналы тарихын ай­ғақ­таған мектеп музейінің ашылу салтанатына куә болды. 80 жыл­дықтың сырын ақтарып, дерегін жинақтаған «Өткені мен бүгінін ұштастырған білім ордасы» атты мерейтойға орай жарық көрген жинақтың тұсаукесу рәсіміне қатысты. Салтанатты жиында бас қосып қимас естелік, өнегелі шежіре, ойлы әңгімелерді ортаға салды.

Халық басынан өткерген мемлекеттік жүйенің өзгеруіне дейінгі замана құбылыстарына куә сексен жылдық шежіре шынды­ғында ғажайып әсерлі. Бұл ал­дыңғы толқын аға буын өкілдеріне қимас естелік болса, жаңа заман жеткіншектері үшін ертегідей қызық хикая сынды.

Иә, қала орталығындағы №3 мектеп-лицей аталатын еңселі ғимараттың іргетасы сонау 1939 жылы қаланған екен. 2003 жылы ескі мектептің қабырғасы қызыл кірпішпен қапталып, қайта жаң­ғыртылып, жапсарлас қосымша ғимарат салынғаннан кейін су жаңа күйге енген.

Әу баста 1937-38 жылдары Сыр еліне саяси қуғындаумен жер аударылып келген кәріс ұлтының өкілдерінің балалары үшін бастауыш мектеп ретінде ашылып, кеңестік саяси-әскери қолбасшы К.Е.Ворошилов атымен аталған мектепке 2017 жылы С.Толыбеков аты берілді. Еегемендік алғаннан кейін елу жылдан астам орыс тілінде білім берген мектепте алғашқы қазақ сыныптары ашыла бастаған.

Ж.АЙМАҒАНБЕТОВА

QAA.kz

QAA.kz - "Ақмешіт ақшамы" газеті. Қазақстан және Қызылорда жаңалықтары.

Пікір үстеу

Э-пошта мекенжайыңыз жарияланбайды. Міндетті өрістер * таңбаланған