Отбасы — адам баласының тәлім-тәрбие алатын алтын бесігі. 2013 жылы Қазақстандағы мереке тізімі отбасы күнімен толықты. Содан бері қыркүйектің екінші жексенбісі елімізде отбасы күні деп аталып өтіледі. Ал мереке қарса­ңында қоғам   назарын отбасылық құн­ды­лықтарды дәріптеу мақсатында еліміз­де жыл сайын «Мерейлі отбасы» ұлттық байқауын өткізу дәстүрге айналған. Отбасы институтын өзара келісім мен рухани сыйластықты нығайту бір шаңырақ астында берекелі өмір сүрудің маңыздылығын арттыруда жарасымды жұп­тар мен береке-бірлік құрған отба­сыларды насихаттауда бұл шараның маңызы зор. Былтыр Астана қаласы мен ҚР Президенті жанындағы ұлттық комиссияның 20 жыл­дығына орай ұйымдас­тырыл­ған кезекті байқауда Сыр елінен Ишанқұловтар отбасы қатысып, тұңғыш президент Н.Назарбаев тағайындаған дипломат иегері атанды. Отба­сының бірлігі жетістіктері мен ерекшеліктері сыналған дәстүрлі байқау биыл да қалалық, аудандық деңгейде өткізіліп, облыстық деңгейге 10 отбасы жолдама алып отыр. Өткен жұма күні «Мерей­лі отбасы» облыстық ұлттық байқауының қорытын­дысы жарияланды. Байқау­дың бас жүлдесін иеленген отбасыға республикалық ке­зеңге жолдама табысталды.

Ең алдымен салтанатты шараны облыс әкімі Қырымбек Көшербаев ашты:

— Халқымыз үшін отбасы күні қашанда қасиетті де қастерлі екені бәрімізге белгілі. “Отан отбасынан басталады” деген қағида ешқашан мәнін жоғалтқан емес. «Мерейлі отбасы — бұл береке-бірлігі, тәлім-тәрбиесі қалыптасқан қағидасы мен асыл қасиет­тері арқылы өзгеге өнеге боларлық шағын мемлекет. Сондықтан, өнегелі отбасылар­ды дәріптеу — парыз. Ана мен баланы қорғауға арналған қаржы, көпбалалы отбасыларға берілетін мемлекеттік жәрдемақылар мөлшері жыл сайын өсуде. Нәтиже де жоқ емес. 2019 жылдың есеп­тік мерзімі бойынша шаңырақ көтерген отбасылар саны 1700-ді құрайды. Бұл көрсеткіш 2014 жылмен салыстырғанда 15 пайызға артып отыр. Аймағымызда 35 мыңнан астам көпбалалы аналардың 17-мыңнан астамы “Батыр аналар”. 2013 жылы облыста халық саны 860 мың болса, қазір 807 мың болып отыр. Табиғи өсім жақсы. Алдағы 7-8 жыл ішінде Сыр елінің халқы 1 млн-нан асады. Аймағымызда алтыншы рет өткізіліп отырған мерейлі шараға қатысушылар жылдан-жылға артып келе жатқаны қуантады. Мерейлі мерекемен баршаңызды құттықтай отырып, әрбір отба­сыға ынтымақ, бақ-береке тілеймін. Әрдайым отбасыларыңыздан береке арылмасын,- дей келе қатысушыларды марапаттады.

Отбасы құндылықтарын дәріптеп, сүттей ұйып отырған шаңырақтардың бірі Қиянбе­ковтер әулеті Бас жүлдені қанжығасына байлады. Отағасы Қиянбеков Әмір Сағым­байұлы еңбек жолын 1959 жылы механиза­тор­лықтан бастап зейнетке шыққанға дейін еліне аянбай еңбек еткен. Жоғары әскери қызметі үшін әскери бөлімнің алтын кітабына енген. Шиелі ауданының Құрметті азаматы. Жары Қалгүл Жүсіпбекова – “Алтын алқа” иегері. Алты ұл, төрт қыз тәрбиелеп 43 неме­ре, 12 шөбере сүйіп отырған мәуелі отбасы.   Келіндері де Қалгүл ананың ізін жалғап, көпбаланы дүниеге әкелді. Екі келіні “Алтын алқа” иегері атанып отыр.

— “Мерейлі отбасы” байқауына қатысу үшін Шиелі ауданы Бидайкөл ауылынан келдік. Жасым 80-де, он баланың әкесімін. Жарыммен отасқанымызға 52 жыл болды, содан бері тату-тәтті бір шаңырақ астында өмір сүріп келеміз. Өзім 40 жылға жуық меха­низатор болып жұмыс істедім. Еңбегім бағала­нып, бірнеше медальдармен марапатталдым. Жұбайым медпункте қызметте болды. Бала­ларым еліміздің өсіп-өркен­деуіне елеу­лі үлес қосып келе­ді. Осын­дай шараны ұйым­дасты­рып, бізге құрмет көрсе­тіп жатқан­дарыңызға мың алғыс. Еліміз тыныш, отбасы­мыз аман бол­сын,- дейді Әмір   Қиянбеков.

Айта кетейік, бес жылдың ішінде байқауға қатысуға 1500-нан аса отбасы өтінім біл­дірді. Биыл байқауға облыстың барлық өңірінен 372 отбасы қатысты. Бас жүлде мен рес­пуб­ликалық кезеңге жолдама Шиелі ауданының Қиянбеков­тер отбасына табыс етіліп, екі адамға отандық шипажайға жолдама берілді. І орынды мал шаруашылығымен айналыса­тын шаруа   Байденовтар отба­сы (Шиелі ауданы) алды, ІІ орын механизаторлар — Қарынбаев­тар әулетіне бұйырды (Жаңа­қорған ауданы). Ал ІІІ орын төрінен Қармақшы ауданының тұрғындары Арифовтар жан­ұясы көрінді. «Өнегелі отбасы» аталымымен Әбдіжаппа­ровтар отбасы (Шиелі ауданы), «Зиялы отбасы» аталымымен   Жана­заров­тар отбасы (Қызылорда қаласы), «Рухты отбасы» аталы­мымен Төрехановтар отбасы (Арал ауданы), «Ұлағатты отбасы» аталымы­мен Есқараевтар әулеті (Сырдария ауданы), «Ынтымақты отбасы» аталымымен Сабырха­новтар әулеті (Жаңақорған ауданы), «Пара­сатты отбасы» аталымымен Сәменовтар отбасы (Жалағаш ауданы) марапатталды.

Барлық жеңімпаздар дипломдарға, бағалы сыйлықтарға ие болды.

А. ОМАШ