QAA.kz

"Ақмешіт ақшамы" газеті

Аялдамаға халық аялдай алады ма?

Автор:QAA.kz

Апр 26, 2019

Бүгінде қала халқының көпшілігі қоғамдық көліктердің қызметіне жүгініп, діттеген жеріне барып, келіп жүреді. Ал, қоғамдық көліктердің көрсетіліп жүрген қызметіне, олар­дың жай-күйіне қатысты мәселелер жетерлік. Осыған орай, қаламыз­дағы 11, 14, 17 бағыттағы жолаушылар көлігіне және ескі базардағы аялдама­ның “Рембыттехника” ғимаратына қарай ауысуына байланысты қалалық тұрғын үй-коммуналдық шаруашы­лығы, жолаушылар көлігі, автомобиль жолдары және тұрғын үй инспек­ция­сы бөлімі, Қызылорда автобус паркі басшысы және жол сақшыларымен бірге рейд жүргізген болатын.

Қызылордадағы қайнаған тыныс-тірші­лікті көліксіз елестету мүмкін емес. Қазіргі таңда бұрынғы ескі газельдер азайып, олар­дың орнына үлкен сыйымдылықтағы көліктер саны артқан. Теміржол вокзалынан бастау алған рейдте ең алдымен қоғамдық көліктердің тазалығы, жол жүру билетінің уақытылы берілуі, және олардың техника­лық жағдайына баса назар аударылды.

Күнделікті бірнеше бағыт бойын­ша жолаушылар тасымалдайтын 17 бағыттағы тасымал көлігінің ішкі және сыртқы тазалы­ғы қуанта қоймады. Себебі, ішкі қабырғасы шимайланып, сыртқы қабырғасы ұрылып, соғылған. Рейдке шыққан­дағы басты себеп, ескі базар маңындағы аялдаманың «Рембыттехника» ғимара­тына қарай ауысуы. Біраз уақыттан бері автобус­тарға ескі базардан мініп, түсіп жүрген халық аялда­маның өзгер­тілуіне қарсы­лықтарын білді­руде. Бұл мәселеге қатысты тиісті сала мамандары былай деді:

— Әйтеке би, Тоқтыбаев көше­лерінің қиылысында орналасқан бағдаршам нысан­дарына көлік құралдарының тоқтап қалып, кедергі келтіруіне байла­нысты осы жердегі автобус аялдамала­рын өзгертіп, оны Әйтеке би көшесіне яғни «Рембыттех­ника» ғимаратының алдына көшіріп жатырмыз. Алдағы уақытта, осыған қатысты біраз жұмыстар жасалып, жол қозға­лысын ұйымдастыру мақсатында жұмыстар атқарылатын болады, — дейді, әкімшілік полиция басқар­масының бөлім басшысы Айбек Құлмағанбетов.

«Рембыттехника» ғимаратының алдына келгенімізде қоғамдық көліктер тұратын аялдамаларға жеңіл көліктердің де келіп тоқ­тайтынын байқадық. Сала маман­дарының айтуынша, заң бойынша жеңіл көліктер автобус аялдама­ларының жанынан 15 метр дейін және 15 метр кейін тұру керек екен. Заңды белшесінен басып жүрген тұрғындарға жол сақшы­лары тарапынан әкімшілік шаралар қолданылатын болады.

— Әйтеке би қиылысында орна­лас­қан аялдаманы тұрғындардан келген ұсыныс және жол кептелі­сінің көп болуына бай­ланысты өзгертіп жатыр­мыз. Бұл авто­бустардың емін-еркін жүруіне байла­ныс­ты ауыстырылып жатыр. Өзгертіл­ген автотұрақ қалалық тұрғын үй-ком­муналдық шаруа­шы­лы­ғы, жолаушы­лар көлігі автомобиль жолдары және тұрғын үй инспекциясы бөлім басшы­ларымен ақылдаса келе әзірге осы “Рембыттехникаға” көшіріп отыр­мыз. Алдағы уақытта бұл мәселе­лер тағы да қаралып, өз шешімін табатын бо­лады, — деді, қалалық автобус паркі пайдалану бөлімінің басшысы Сайлаухан Постанов.

Бұл аялдаманың өзгеруіне қара­пайым халықтың біразы қарсы. Қала­лық автобус паркі автокөлік пайдалану бөлімі басшысының айтуынша бұл ұсыныс тұрғындар тарапынан келіпті. Ал, сол аялдама маңына бара бергені­міз­де ұсыныс тастады деген халықты көрмедік. Себебі, олар “Рембыттехника­ға” көші­рілген аялдамаға қатысты «Ол біз үшін алыс орналасқан. Біз осы аял­дамаға үйреніп қалдық» деген секілді шағымдарын жеткізіп жатты.

Сала мамандарымен және қала белсенділерімен бірге жүргізілген аял­дамаға қатысты түйіткілді мәселенің шешімін алдағы уақытта көретін боламыз.

Т.КЕНЖЕБАЕВА

QAA.kz

QAA.kz - "Ақмешіт ақшамы" газеті. Қазақстан және Қызылорда жаңалықтары.

Добавить комментарий

Ваш адрес email не будет опубликован. Обязательные поля помечены *