Кәсіпкерлердің бұл игілікті қадамы туған жерге тарту жасаудан туындаған. Қазір Қызылорда облысы әкімінің бастамасымен Қызылорда қаласындағы 26 көпқабатты тұрғын үйдің қасбеті қайта жаңғыртылуда.

Жоба бойынша бұл жұмысқа жалпы ауданы 40 000 шаршы метр заманауи материалдар қолданылады. Соңғы үлгідегі, сапалы материалдармен қапталған тұрғын үйлердің қасбеті шаһардың сәулеттік келбетіне жарасымды көрік беретін болады.

Әрлеу жұмыстары жергілікті демеушілердің, атап айтқанда қала құрылысшылары мен кәсіпкерлерінің қолдауымен жүргізілуде. Тұрғын үйлердің қасбетін қаптау шілде айына дейін аяқталады. Қазір Абай даңғылындағы №46, №54 және №62 үйлер, Сырдария шағын ауданындағы №1 және №2 тұрғын үйлердің сыртқы қасбетін әрлеу жұмыстары басталып та кетті.

Облыс әкімі Нұрлыбек Нәлібаев Қызылорда қаласындағы көпқабатты үйлердің қасбеттерін жаңалауға қаражат бөлген кәсіпкерлермен кездесті. Аймақ басшысы алдымен әкімшілік жиын өткізді. Соңынан аралап көрді. Жұмыс сапасына басымдық берілуі тиіс екенін атап айтты. Кәсiпкер жерлестерін туған жерді көркейту ісіне белсенді атсалысуға шақырды.

– «Мемлекет басшысы Қасым-Жомарт Кемелұлы туған жеріне жанашырлықпен қарайтын кәсіпкерлерді патриотизм мен әлеуметтік жауапкершіліктің үлгісін көрсетіп, ел экономикасын дамытуға үлес қосуға шақырған болатын. Бұл жұмыстарға жергілікті кәсіпкерлер, осы топырақтан түлеген меценаттар белсенді араласуда. Қайырымдылық шараларына, атамекенін көркейтуге бар күш-жігерін салуда», – деді Нұрлыбек Машбекұлы.

Кездесуден кейін облыс әкімі әрлеу жұмыстарына қолданылатын материалдардың түрлерімен, сапасымен танысты.

Толық нұсқасын «Ақмешіт ақшамы» газетінен оқи аласыздар