25 мамыр – мектеп бітірушілер үшін алтын ұямен қоштасып үлкен өмірге қадам басатын сәт болса, мектеп оқу­шылары үшін көңілді жазғы демалыс, енді бірі үшін тынымсыз еңбек тоқсаны. Түлектер соңғы рет соңғы қоңырау үнін естісе, демалысты асыға күткен оқу­шылар үшін тоғыз ай бойы көтерген сөмкені үш айға тастап мектеппен аз уақытқа қоштасар күн. Сондай-ақ, бұл күні өңіріміздегі барлық мектептерде соңғы қоңырау соғылады.

Мамыражай мамыр айының 25 күні Мырзабек Дүйсенов атындағы №15 мектеп-лицейінде «Болашақ жастардікі» атты соңғы қоңырау салтанаты өтті. Түлектер үшін соңғы рет соғылған соңғы қоңырау шарасы Қазақстан Республикасы Әнұранымен басталды. Мерекелік шараға Қызылорда қаласының әкімі Нұрлыбек Нәлібаев келіп мектеп бітірушілер мен ұстаздарды мерекелерімен құттықтап, алдағы ҰБТ-дан сүрінбей өтулеріне сәттілік тіледі.

– Құрметті мектеп бітіруші түлектер мен ұстаздар, сіздерді кезекті оқу жылының аяқталуымен, жас түлектеріміздің мектеп бітіруімен құттықтаймын. Бүгін ерекше тебіреніс пен толғанысқа толы күн. Тағы бір оқу жылы артта қалды. 11 жыл бойы білім теңізінен нәр алып, мектеп атты ұлы білім ордасыннан тәлім-тәрбие алған әрбір түлек үшін бұл сәт жаңа өмірдің бастамасы. Бүгін барлық мектептерде балғын балалықтың соңғы қоңырауы соғылуда. Қазіргі таңда, қаламызда 1725 түлек жаңа өмірге жолдама алуда. Олардың ішінде 1315 мектеп бітіруші ұлттық бірыңғай тестілеуде бағын сынамақ. Оның 120-сы «Алтын белгіге», 101-і «Үздік аттестатқа» үміткер және 92 түлек халықара­лық және республикалық жоғарғы оқу орында­рының өткізген олимпиадаларына қатысып, грант иеленгендер. Білім беру ата-ана үшін ғана емес, ұстаз үшін де — парыз. Қазір білім санмен емес сапамен өлшенетін уақытқа айналды. Кемел білім мен ғылымды басты бағдар еткен елімізде, әр азаматтың білім алып қалыптасуына қажетті барлық жағдай жасалған. Соның нақты көрінісі, бүгінде қала мектептерінің материал­дық-техникалық базасын нығайту, білім беру сапасын арттыру, жаңа технологияларды ендіру бағытында ауқымды жұмыстар атқарылуда. Осының барлығы сіздердің келешекте бәсекеге қабілетті, білікті маман болып қалыптасула­рыңыз үшін жасалып жатқан нақты шаралар. Сапалы білім, саналы тәрбие берген ұстаздар­дың және аялап өсірген ата-аналардың үмітін ақтап, тәуелсіз еліміздің өсіп-өркендеуіне жас түлектердің қосар үлесі зор деп сенеміз, — деді қала әкімі Н.Нәлібаев.

Биыл қала бойынша орта білім алып шыққан 1725 түлек үлкен өмірге қадам басты. Олардың армандары асқақ. Бірақ көңілдері алаң. Себебі, алда олар үшін «ұлы бір төңкеріс» саналатын ұлттық бірыңғай тестілеу және мамандық таңдау деген секілді жауапты кезең күтіп тұр.

Мырзабек Дүйсенов атындағы №15 мек­теп-лицейі былтырғы 2017-2018 оқу жылын­дағы ұлттық бірыңғай тестілеудегі көрсеткіш бойынша 96,5 пайызбен көш басында тұр. Абылай Жалғасбай мен Азат Әлдешов былтыр­ғы оқу жылындағы ҰБТ нәтижесімен бірі 135, бірі 134 балл жинап, мектептерінің мерейін өсірген. 11 жыл бойы білім нәрімен сусындатқан мұғалімдерінің биыл да сондай көрсеткіштерге жетеміз деген үлкен үміті бар. Биыл мектеп абыройы мен ұстаздарының үкілеген үмітін ақтаймыз деген 68 мектеп бітіруші бар. Олар­дың 5-і «Алтын белгіге» үміткер болса, 10-ы «Үздік аттестат» иегері. Ал, 2 оқушы ЖОО-ы өткізген түрлі олимпиадалар қорытындысымен мемлекеттік грант жеңіп алғандар.

Қала әкімінің құттықтау тілегінен кейін түлектер мектеппен қоштасу әнін орындап, шараға жиналғандардың діріл қаққан сезімдерін одан әрі толқытып жіберді. №15 мектеп-лицейінде 68 оқушыға соғылған соңғы қоңырау үні олар үшін естен кетпесі анық. Себебі, олар мектеп табалдырығын аттағаннан алғашқы қоңырауды, әліппені үйреткен алғашқы ұстазын, бір-бірінің бала күнгі талай тентектіктерін барлығын ұмытпайды.

– Биылғы 2018-2019 оқу жылы «Жастар жылымен» тұспа-тұс келіп отыр. Осынау 25 ма­мыр айтулы күні бүкіл түлектердің жүректерінде бір жылы сезім пайда болатыны баршамызға белгілі. Қимастықпен алтын ұямызды тастап бара жатқанымыз әрине, менің де көңіліме бір ерекше сезім ұялатқаны рас. Қазіргі таңда менің таңдап отырғаным биология-химия пәні. Бола­шақта қоғамдық денсаулық сақтау мамандығы бойынша жұмыстар жасағым келеді. Менің осын­дай жетістікке жеткенім, бізді осындай шәкірт етіп тәрбиелеген, білім берген ұстаз­дарымның арқасында, — дейді мектеп бітіруші түлек Жаннұр Қалыбек.

Сонымен, сыңғырлаған соңғы қоңырау үнін соңғы рет еститін сәт те келіп жетті. Оқу үздігі болған Досымжан Шалман пен 5 сынып оқушысы Құралай Мерген барша қауымның алдында соңғы қоңырауды соғып өтті.

– Мен №15 мектеп-лицейінде оқығаныма өте қуаныштымын. Мектепте білім берген мұғалім­деріме алғысым шексіз. Жаңа өмірге қадам басқалы жатырмыз, осы қадамымызға гүл бітсе екен. Мектеп бітіріп жатқан барлық түлектерге сәттілік тілеймін, — дейді «Үздік аттестат» иегері Сәлима Мұғжапбар.

Түлектер қимастықпен әндерін шырқап, ақ жол тілектерін ұстаздарына жаудырып жатқан да, енді ғана мектеп табалдырығын аттап жатқан кішкентай балалар жас түлектерге дайындаған тілектері мен тақпақтарын айтты.

Соңдарынан ерген кішкентай балалардың тілегінен кейін түлектер мектептегі соңғы қоңы­рау шарасынан есте қалар қоштасу вальсін биле­ді. Мектеп алаңының қақ ортасына жинал­ған бітірушілер әуенге ілесе отырып, мың құбы­ла билеп шықты. Түлектер үшін соғылған соңғы қоңыраудың соңы қолдарына ұстаған ақ көгер­шіндері мен аспанға шар ұшыру сәтімен аяқталды.

Кіршіксіз таза пейілдеріндегі жүрек­жарды жылы лебіздерін кеуделеріне таққан лента­ларына жарыса жазып жатқан түлектер, осы бір әрекеттері арқылы мұғалім­дері мен жиылған ата-аналардың көңіліне ерекше бір сезім ұялатты.

– Бүгін Мырзабек Дүйсенов атын­дағы мектептің 11 «Б» сыныбын неме­рем бітіріп жатыр. Міне, «тарыдай болып кіресің, таудай болып шыға­сың» демекші, немерем үлкен азамат болып мектеп бітіріп отыр. Ұлы Абай «баламды медресеге біл деп бердім» деген ғой, міне, біз де баламызды осыдан 11 жыл бұрын білім алсын, біл­сін деген ниетпен М.Дүйсенов атын­дағы №15 мектеп-лицейіне бердік. Білім беріп, қатарының алды қылған ұстаздарына алғысымызы шексіз. Барлық бала­ларға ақ жол тілеймін, алдынан жар­қыраған күн шықсын. Алға қойған ар­мандары орындалсын. Халқына қа­лау­лы, еліне елеулі азамат пен аза­матша болсын. Міне, менің де осындай сыңғырлаған соңғы қоңы­рауды есті­геніме 50 жыл толыпты. Сезім ерекше, — дейді арнайы неме­ресіне келген Айман әже Әмзеева.

– Біздің мектеп 2018-2019 оқу жы­лында көптеген жетістіктерге жетті. Оқушыларымыз түрлі халық­аралық, республикалық, облыстық, қалалық байқауларға қатысып жүл­делі орындарды иеленді. Мәселен, Дубай қаласында өткен Халықаралық ғылыми-тәжірибелік конферен­цияға 4 оқушы қатысып, биология бағыты бойын­ша 9 сынып оқушылары Айме­рей Байғабылова, Дана Айдарбек бас жүлдемен оралса, география бағыты бойынша Шахри­зада Ақмұрат І орынды қанжығасына байлады. Ал, химия бағыты бойынша 10 сынып оқушысы Афрасияб Кобдиков жүлделі І орынды ием­денді. Сонымен қатар, Москва қаласында өткен «Математика және жобалау» ғылыми жоба конкурсына қолданбалы матема­тика бағыты бойынша Назым Жұмабай есімді оқушымыз қатысып ІІІ орынды иеленді. Мектебі­міздің жетер жетістіктері әлі алда. Саналы ұрпақ тәрбиелеу жолында барынша күш-жігерімізді жұмсайтын боламыз, — дейді мектеп директоры Күміскүл Серекеева.

Өмірдің жаңа белестеріне сақадай сай тұрған мектеп бітірушілерге айтарымыз, дүниенің қай бұрышында болсаңдар да білім нәрімен сусындатып, үлкен өмірге қадам басуда шамшырақтарың бола білген мұғалімдерің мен 11 жыл бойы екінші үйлерің болған мектептеріңді ұмытпаңдар дегіміз келеді. Сәт сапар, сіздерге, жас түлек!

Т.КЕНЖЕБАЕВА