Кезекті еңбек демалысынан келген қала әкімі өз жұмысына кірісті. Қала әкімі Н.Нәлібаев ең алдымен ауылдық округтердегі жүргізіліп жатқан жұмыстар барысымен танысуды құп көрген сыңайлы. Сонымен, 23 шілде күні Н.Нәлібаев Қарауылтөбе ауылдық округіне ат басын бұрды. Негізгі себеп, ауылдағы С.Байсейітова көшесіндегі орташа жөндеуден өткен жол, А.Иманов көшесінің бойындағы газ құрылысымен танысып, тұрғындармен тілдесу.

Бүгінде ауылдық жерлердің көркеюі мен дамуы үшін атқарылып жатқан жұмыстар жетерлік. Көптеген ауылдық округтер мен кенттердің жолдары жөндеуден өтіп, тұрғындар газбен қамтамасыз етілуде.

Қарауылтөбе ауылдық округінің жай-күйімен танысуға келген қала әкімі алдымен ұзындығы 1,6 шақырым болатын Сары Байсейітов көшесіне жүргізілген жол жөндеу жұмыстарымен танысты. Орташа жөндеуден өткен бұл жолға облыстық бюджеттен 48 864 мың теңге бөлінген. Оны мердігер «Стандарт Ойл КЗО» ЖШС жүргізген. Биылғы жылдың маусым айынан бастап жұмыстарына кіріскен мердігер компания жоспарлаған межелі уақыты қыркүйек айына жеткізбей шілде айында жұмысты тиянақты түрде аяқтаған. Қала әкімінің жөндеуден өткен жолдармен танысады дегенін естіп келген ауылдың бірнеше ақсақалы жұмыс басына келіпті. Олардың әкімге айтар рахметі мен уәжін де тыңдадық. Қарауылтөбенің ақсақалдар кеңесінің төрағасы Аманкелді Досмаханұлы әкімге: «Қайыр қылсаң, бүтін қыл» демекші, Сары Байсейітов көшесінен кейінгі Қызыл­жармаға қарайғы 1,2 шақырымды құрайтын жолды да асфальттап берсеңіздер. Себебі, соңғы аялдамасы біз жақтағы көпірден 1 км ғана алшақ тұрады. Егер де Қызылжар­ма­дан бері қарайғы жол жөндеуден өтсе, қоғамдық көліктер 2 бағытта қатынайтын еді. Қоғамдық көліктің екі жаққа да қатынағаны қызылжар­малық тұрғындар үшін де, қарауылтөбеліктер үшін де тиімді болар еді» деді.

— Барлық мәселе рет-ретімен шешіледі. Бар­лығына бірдей бюджеттің мүмкіндігі болмайды. Не нәрсе болса да ең алдымен қаражат керек. Мәселе тек қаражатпен ғана шешіледі. Сол себепті, кішкене шыдасаңыздар шешімін табамыз. Маршруттан ешқандай да мәселе жоқ. Бастысы жол болғандықтан, алдағы уақытта екі ауылдың әкімдері өзара жолға керекті қара­жатты есептеу керек, — деді қала әкімі Нұрлыбек Машбекұлы.

Жолдың жағдайын көрген қала әкімі одан кейін жүргізілген газ құрылысының бары­сымен танысты. «ҚазТрансГаз Аймақ» АҚ-ның демеу­шілігімен жүргізілген газ құбыр­ларын тарту жұмыстарының құны 33 млн. теңге. Бүгінде ауылдың 110 тұрғын үйі көгілдір отын кіргізіп жатыр. Ал қалған 138 үйдің тұрғындары жыл соңына дейін газбен толық қамтылатын болады.

— Қарауылтөбе ауылдың округінде 2167 тұрғын бар. 375 отбасы бар. Биылғы жыл біздің округте жақсы жаңалықтар жетерлік. Ауылда халықтың көп сұрайтыны газ кіргізу болатын. Міне, бұл мәселе де өз кезегімен «ҚазТрансГаз Аймақ»   АҚ-ның демеушілігімен шешімін тауып жатыр. Газдандыру жұмыстарына қажетті жабдық­тарды беретін меке­мелерді «ҚазТрансГаз Аймақ»-пен бірігу арқылы тауып жатыр­мыз. Алдағы тамыз айында «Мектепке жол» акциясы баста­лады. Былтырғы жылы 75 оқушыға көмек көрсетілсе, биыл да ол акция өз жалғасын табады. Сонымен қатар, Елба­сымыз айтқандай дамы­ған 30 елдің қата­рына кіру үшін шағын және орта бизнесті дамыту керек. Міне сол, шағын және орта бизнес ауылға қажет. Себебі, ауылдық жер­лерде мал бордақылау сынды жұмыстар жасауға ыңғайлы. Осы бағытта 8 жобамыз өтіп тұр. 4 жоба «Ауылшарушылығын қаржылай қолдау қоры» арқылы болса, 4 жобамыз «Қызылорда» Өңірлік инвести­циялық орта­лығы» арқылы қаржылан­ды­рылады. Олардың бірі мал бордақылаймыз десе, бірі монша, енді бірі шаштараз ашамыз дегендер. Біздегі кәсіпкерлік деңгейі жыл басында 76 пайыз болса, қазіргі уақытта 92 пайызға жетіп тұр, — дейді Қарауылтөбе ауылдық округінің әкімі Бекболат Шәріпбеков.

Ауылдық округтегі газ тарту желісінің жалпы ұзындығы 4,2 км (110 үй). Оны «Лидер Контракшн» ЖШС жүргізген. «ҚазТрансГаз Аймақ» АҚ-ның демеуші­лігі­мен жасалып жатқан жұмыс маусым айында басталған.

Барлық нысандарды аралаған қала әкімі ауылдық округте орналасқан №179 Айтбай Хангелдин атындағы мектепке барып, жеке қабылдау өткізді. Қабылдауға келген тұр­ғын­дардың басым көпшілігі әкімге алғысын айтып жатты, енді бір-екеуі округке мәде­ниет үйі (клуб) мен газға қажетті жабдық­тарды сататын дүкен ашып беруін сұрады. Тіпті, әкім қабылдауына келген бір тұрғынға округ әкімі Бекболат Шәріпбеков сіздерге газға қажетті барлық жабдықтар сататын дүкен ашып жатырмыз. Жақында орталыққа бармай, осы жерден ала аласыздар деді.

— Осы ауыл «Ғалымдар мекені» деген атағы шыққан елдімекен. Күріштің сорттарын өсіруде. Ауыл жылдан-жылға ұлғайып, жақсарып келеді. Мұнда қай салада болмасын алға жылжу бар. Ауы­лы­мыз «Елге ел қосылса-құт, елден ел кетсе-жұт» демекші елге ел қоысылып, халық саны да артып дамып жатырмыз. Қалаға Нәлібаев келгелі біраз мәселеміз шешімін тапты. Қоғамдық көліктер қатынап, жолдарымыз жөндеуден өтіп жатыр. Одан бөлек, 2011 жылы жаңа орта мектеп салды. Ал қазіргі біздің мәселеміз газ болып тұр. Бірақ ол да өз шешімін тауып, тікелей қала әкімінің қолдауымен газдандыру жұмыс­тары жүргізіліп жатыр. Ауылдың тыныс-тіршілігі, жалпы жағдайымыз жақсы. Ел болғандықтан шешімін таппаған түрлі мәселелер бола береді, десе де біздің мәселелер шешіліп жатыр, — дейді   Қарауыл­төбе ауылдық округінің ардагер­лер кеңесінің төрағасы Аманкелді Досмаханұлы.

Қарауылтөбеліктердің мұң-мұқтаж­дығына құлақ түрген қала әкімі тұрғындар тарапынан айтылған барлық мәселелердің өзінің қатаң бақы­лауында болып, ауылды көркейту мен дамы­туда талай игілікті істерді атқара­тындығын айтып сендірді.

Т.КЕНЖЕБАЕВА