QAA.kz

"Ақмешіт ақшамы" газеті

Әкесі оның жақсы адам…

Автор:QAA.kz

Апр 2, 2020

Үміт ақталмады. Аудан түгі­лі ауыл басқарып көрмесе де мықты әкім болар деп үміт еттік…

Қаншама жылдар салық, қаржы саласында басшылықта жүрген қаржыгер ретінде об­лыстың шығысын да, кірісін де көбейтер деп үміт еттік…

Көпбалалы отбасынан шық­қаны бір бөлек, өзі де көп балалы отбасы иесі болғандықтан көп балалы отбасы көп Қызыл­орданың көп мәселесін көпке ұзартпай оң шешер деп үміт еттік. Бәрінен де біз оқ пен оттың арасында қан кештік деп көкірек ұрып, әділдік сұрайтын Ауған соғысына қатысқан ара­мызда көп емес соғыс көрген жауынгерлердің бірі ретінде қолы таза, жүрегі адал болар деп үміт еттік…

Ең аржағы әкесі Дос­майыл елге сыйлы, қыз­метте абыройлы жақсы адам болған еді деп үміт еттік.

Бір өзіне деген көп үміт­пен көп іс тындырдық. Оны­мен бірге Арыс қайғы­сына ортақтастық, Түркістан мон­шасын салдық, қыс қаһа­рына қарамай ауыл-ауылды аралап, ел жағдайымен та­ныстық. Тіпті, әлдебір сайт­тың жариялаған рейтин­гісінде көш басына шығару үшін ауыл-ауыл, аудан-аудан болып онлайн дауыс жинадық…

Бұдан біршама уақыт бұрын Үкіметтің кеңейтілген мәжілісін өткізген Президент Қ.Тоқаев “Әзірге ешкімге сөгіс те бермеймін. Бірақ, көктемде кейбіреулердің мәселесін ше­ше­мін” деп елге көктемді күт­тіріп қойды.

Күткен көктем де келді. Тіпті алғашқы бір айы аяқталуға да таяп қалған. Жер-жерден коронавирус деген пәле шығып жатқанда Қызылордаға ол індеттің келмегеніне  бір үміт, бір күмәнмен қарап отырғанда кенеттен жайсыз хабар шықты.

Қызылордада сыбайлас жемқорлыққа қарсы қыз­мет жедел басқармасы басшы­сының міндетін атқарушы ұсталды.

«Өз қатарының тазалығын қамтамасыз ету саясатын іске асыру мақсатында, ағым­дағы жылдың 20 наурызында сыбайлас жемқорлыққа қар­сы агенттіктің ішкі қауіпсіздік департаменті 3 басқарма уа­­қытша бастығына қа­тыс­­ты сотқа дейінгі тер­геу бастады. Ол аса ірі кө­лем­де пара алды деген күдікке ілініп, қазіргі уақытта ұсталып, Қызылордадағы МТБ-ға орналастырылды. (Ресми ақпарат көзінен).

Арада жүрген Алпамыс дегеннің 400 мың доллардың 100 мыңын өзіне қалдырып қалғанын әлгіге беруге әрекет­тенгенінен-ақ жұрт жүрегі зырқ ете қалды. Астана сияқты ірі мегаполистерге 400 мың дол­лар деген дым емес шығар, ал бірақ Қызылорда үшін “түйені түгімен” жұтқанмен бірдей. Әліп­тің артын баққан жұрт араға бір-екі күн салып облыс әкімінің қамауға алынғанын бір-ақ білді.

27 наурызда әлеуметтік желілер мен мессенджерлер арқылы Қызылорда облысы­ның әкімі Қуанышбек Ыс­қа­қовтың ұсталғаны тура­лы ақпарат тарады. Әзір­ге бұл мәлімет ресми түр­де расталып, не жоққа шыға­рылған жоқ.

Саясаткер  Ербол Еділовтің өзінің Telegram арнасында кейбір дереккөздердің де­ре­гіне сүйене отырып жа­зуын­ша, жемқорлықпен күре­сушілер әкімді ғана емес, оның орынбасарын, сондай-ақ өңір басшысына туыс болып келетін екі кәсіпкерді де ұстаған. (Ресми ақпарат көзінен).

Не айтарға білмеген жұрт үшін дәл сол сәтте дәл осы жайсыз хабардан гөрі коро­навирустың Қызылордаға кел­гені дұрыс еді. “Өлімнен ұят күшті” дегендей коронавирустан ұят, намыс күшті болды.

Бәрінен де қиыны, бюд­жеттің ақшасын бәлен млрд-тап жымқырғандарды, тендер­лерден 30 пайыздан сыйақы алғандарды, портретін аукцион­да бәлен млн-ға сатқандарды естіп үйренген жұртқа Қызыл­орда облысы әкімінің Арыс қала­сындағы қайғылы жағ­дай­ға орай баспанасынан, күн­көрісінен айрылғандардың қамы үшін деп мұғалімі, дәрігері, басшы, қосшысы, бизнесмен бас­қасы бар елден жиналған қайырымдылық ақшасын қол­ды еткені ұят болды. Бәлкім отбасындағы көпбаланың қамы үшін деп халық қамын құрбан етті… Не болғанда да сыбайлас жемқорлық тарихында бұрын болмаған жаманат елге жайылды.

Қызылорда облысының экс-әкімі Қуанышбек Ысқақов үй қамаққа алынды.

Ресми мәліметке сәйкес, 2020 жылы 28 наурызда сы­байлас жемқорлыққа қар­сы іс-қимыл агенттігі Қы­зылорда қаласының ма­ман­дырылған тергеу соты­на өтініш хат жолдап, Қызылорда об­лы­сының әкі­мі Ысқақовқа қатысты үй қамаққа алу шарасын қолдануды сұраған. Оған ірі көлемде алаяқ­тық жасағаны үшін Қыл­­мыстық кодекстің 190-бабы, 4-бөлігінің 2-тармағы бойынша айып тағылып отыр.  

«Күдікті Қуанышбек Досмайылұлы Ысқа­қов­қа қатысты «үйқамақ» түріндегі бұлтартпау ша­­расын қолдану тура­лы өтінішхат қана­ғат­тандырылды. Үй­қа­мақ­­тың мерзімі 2 (екі) айға – 26.03.2020 жылы сағат 22:28-ден  бастап 26.05.2020 жылы сағат 22:28-ге дейін белгіленген. Қаулы заңды күшіне енген жоқ», — дейді сот мамандары. (Ресми ақпарат көзінен).

Енді біреулер үшін “соңында мықты команда, артында нақты тіреуіші болмаса әкім болып керегі жоқ”. Көңілі қалған жұрт өз-өзін осылай жұбатты. Тіпті біреулер аймақтың оңтүстік пен солтүстігі арасындағы айқас деп те арандатты.

Бір қызығы “әлдебір әкім ұсталыпты десе” айызы қанып қалатын табашыл жұрт бұл жолы оны әлдебір себептермен ақтап алуға тырысты.

P.S. “Әкесі оның жақсы адам…” деп жақауратқан жұрт жақсы әкенің баласының да жақсылығы туралы жақ аша алмай қалды…

QAA.kz

QAA.kz - "Ақмешіт ақшамы" газеті. Қазақстан және Қызылорда жаңалықтары.

Добавить комментарий

Ваш адрес email не будет опубликован. Обязательные поля помечены *