Қала әкімінің елді мекендер мен ауылдық округтерге сапары жал­ғасуда. Мақсат – қалаға қарасты ауыл тұрғында­рымен кездесіп, өткен жылы атқарылған шаруаларды баяндау. Сондай-ақ, елді мекен әкімдерінің есебін тыңдап, халықтың ұсыныс-пікірілерін білу.

Осы жоспар негізінде Нұрлыбек Нәлібаев кезекті сапарын Қызылөзек ауылына арнады. Аталмыш елді мекеннің мәдениет үйінде өткен жиынға жиналған жұртшылық алдымен ауыл әкімінің сөзіне құлақ түрді. Атқарылған жұмыс­тары тыңдалып, артынша сарап­тама жасалды. Оның сөзінше халыққа қажетті жарық, жол, көгалдандыру жұмыстары реттел­ген. Ауыл оқушылары мектепте білім алып, мәдениет үйіндегі әртүрлі үйірме­лерге қатысуда. Сондай-ақ, олардың ұйым­дас­тыруымен түрлі бағыттағы шара­лар өткізілуде. Бүгінге дейін Қызылөзекте өзекті болған дәрі­герлік амбулатория да шешімін тапқан. “Мемлекеттік-жеке­меншік” әріптестік аясында салын­ған құрылыс нысаны жақын арада ашыла­тынын айтып, алдағы уа­қытта ауыл орталығынан өзге жолдарға жөндеу жұмыстары жүргізіледі деп сендірді.

Сондай-ақ, қала әкімі де қызылөзек­тік­тердің алдында жыл бойы атқарған жұмыстары туралы есеп берді. Нәлібаев кез­десудің біраз уақытын халықтың пікіріне арнап, олардың тарапы­нан айтыла­тын ұсыныстарға зер салды. Қызылөзек­тіктер енді ауыз су мәселесі толық реттеліп, газ жүйесіне қосылып, әртүрлі ша­руа­шылық салаларды дамытуды көздейді.

Қызылөзек ауылының тұр­ғыны Гүлмира Сариева :

— Ауылымызға ірі шаруашы­лық кәсіп керек. Кезінде мал азығын дайындайтын жер және ет өнімдерін әзірлейтін ірі кәсіп­орын да болды. Соған сәйкес, техникалар­мен де қамтылды. Бірақ, ол мүмкіндіктер өкінішке орай жеке кәсіпкердің үлесіне кетті. Бүгінде ауыл әкімінің сөзінше жердің 70 пайызы жеке­меншікке тиесілі. Кәсіп бастау үшін жер үлесі заң аясында шешілсе деген ұсынысымыз бар. Сол кезде қорамыз малға, қаза­нымыз асқа толар еді. Ірі кәсіп­керлер бізден де шығады…

Қызылорда қаласының әкімі Нұрлыбек Нәлібаев:

— Біріншіден, ол жерді бүгінде ныса­налы мақсатқа сай пайдаланып отырға­нын анықтау керек. Егер әрі қарай жерді игеруге жоспарлары болмаса ел игілігіне қайтару үшін ұсыныс білдірген жөн. Келіспеген жағдайда сот арқылы қайтаруға негіз бар.

Ауыл әкіміне осылай тапсырма берген Нәлібаев қалған 30 пайызға тиесілі жерді де белгілі бір мақсатқа пайдалану үшін жайылымдық немесе егіндікке сәйкестігін зерттеуді тапсырды. Содан кейін арнайы ин­вестор арқылы бос жердің игерілуін қадағалауға алу керектігін тілге тиек етті. Сондай-ақ, әкім ауыл тұрғын­дары арасы­нан кәсіп бастауға ниеті барлар үшін мемлекет тарапынан жеңілдетілген несие­лер алуға көмек беруге әзір екенін жеткізді. 

Қызылөзек ауылының тұрғыны Жамал Қайырбекова:

— Барлық сала негізінде жасаған жұмыс­тарыңызды есеп беру кездесуі ар­қылы біле түстік. Бүгінгі кезде­суде әртүрлі мәселелер көтерілді. Бірақ, денсаулық мәселесі талқы­ланбады. Айдың аяғына таман ауылымызда амбулатория ашылу көзделуде. Әйткенмен, біздің ауылда дәрігер мамандар жоқ. Медициналық орталыққа әртүрлі бағыт бойынша білікті дәрігерлер керек. Осы мәселе турасында қолғабыс етсеңіздер жақсы болар еді. Мәселен, “Дипломмен ауылға” бағдарла­масы аясында болса да біраз мамандармен қамтуға болады. Адам болған соң, бірінің іші ауырса, енді бірінің тісі ауырады ғой…

 Қызылорда қаласының әкімі Нұрлыбек Нәлібаев:

— Ұсынысыңыз өте орынды. Біз үшін халықтың денсаулығы бірінші орында болуы тиіс. Сол үшін де бұрын болмаған медициналық орталықты   жекеменшік әріптестік аясында салдық. Бұйыртса, жақын күндері ашылады деп күтілуде. Дәрігерлік амбулатория  барлық қажетті құрал-жабдықтармен жаб­дықталған. Алдағы уақытта маман­дармен де қамты­лып, олар тұрақты түрде жұмыс істейтін болады. Мен сіздің бұл ұсынысыңызды бақылауға аламын.

Бұл ауыл тұрғындары көтерген мәсе­лелерден өзге әрі өзгеше ұсыныстар тізімі. Қала әкімі әр пікірді ескеріп, елеусіз қалдырмау үшін ауыл әкіміне халықпен бірлесіп жұмыс жасауды тапсырды.

Айта кетейік, есеп беру кездесуі барысында Қызылөзек ауылының әкімі Әбдіжаппар Сәкен мырза атқарылған жұмыстардан бөлек алдағы жоспар­ларына да тоқталды. Мәселен, ауылға кіре беріс жол бойындағы «Қожақ» автомо­биль көпірін күрделі жөндеу жұмысы­ның жоба-сметалық құжат­тарын әзірлеп,  бекеттен салынып жат­қан «ауыз су жинау қоймасы» құры­лысының ІІ тетігі бойын­ша атқа­рылатын жұмыс­тарды нәтижелі аяқтауды алдағы міндеті ретінде атап өтті. Сондай-ақ, халықтың ұсыныс­тарында айтылған Е.Дәуіт­баев, С.Сейфуллин, Ш.Ибраева, Ж.Жабаев көшелеріне орташа жөндеу жұмыстарын қолға алып, жарықтан­дыруды қажет ететін 10 шақырым көше­лерге жарық баға­наларын орнатуға жұмыс жасай­тынын жеткізді. Әкім алдағы жос­парлардың тізіміне балалар­дың бос уақытын тиімді өткізу үшін Қара­өзек бекетіндегі №128 және Айна­көл ауылындағы №175 мектептер жаны­нан спорт зал ашу енетінін де айтты.

Әкімнің бұл жоспарларының орындалу барысы біздің де ескеруі­мізден тыс қалмақ емес…

А.ӘЛИАРЫСТАН