«Балапан басына, тұрымтай тұсы­на» деген сонау 90-жылдардың қиын­шылығында елдің қажетіне асарлатып салынған дүние еді, енді тозып тұр», — деп Жалағаш аудандық аурухана­сының ғимаратын қайта салудың жайы айтылып жүргелі де бірталай жылдың жүзі болған. «Жыр болған аурухана құрылысының сәті түсті-ау, ақыры!» деп ел қуанысқан күн де жетті.

Биыл мамыр айында аурухананың іргетасы қаланды.

Жалағаш кентіне жолымыз түскенде аурухана құрылысы жайымен таныса кетуді жөн көрдік. Құрылыс жұмысын бүгінде облыстағы іргелі компания­лардың бірі «Абу-Сер» ЖШС жүргізуде екен. Құрылыс нысаны басынан жолық­қан учаске бастығы Қайыржан Жұмаді­лаев жоспарлы жұмыстың діттеген деңгейде жүргізіліп жатқанын айтты.

Аурухана іргетасын 15 мамырда қалауды бастадық. Салтанатты жағ­дайда өткен шараға сол кездегі облыс әкімі Қырымбек Көшербаев қатысып іргетасын өзі қалап берген болатын. Қазір 3 блоктың іргетасы қаланып болды. 2 блоктың қабырғасын қалап жатырмыз. Бірер күнде 3 блоктың қабырғасы қалауға кірісеміз. Құры­лыстың сапалы, уақытылы жүргізілуіне ешқандай кедергі жоқ. Жұмыс қолы жеткілікті. Қажетті техникамыз сақа­дай сай, жұмыс үстінде. Құрылыс материалдары да уақытылы жеткізіліп тұр. Құрылыс жоспар бойынша 21 айда аяқталады. Қазір белгіленген жұмыс көлемін орындап жатырмыз, — деді учаске бастығы.

100 төсектік орынға арналған ауру­хана ғимараты келер жылы пайдала­нуға беріледі. Қазір құрылыс нысаны басында 90-ға жуық жұмысшы жұмыс істеп жатқан болса, оның 70 пайызы жалағаштықтар екен. Бұрындары осындай құрылыс нысандары басынан бірыңғай өзбек ағайындар табыла­тыны сирек жағдай емес-тін. Қазір құрылыс басынан жергілікті жұмыс­шыларды кездестіріп жүрміз. Осы орайда бізбен сұхбат барысында аудан әкімі Қ.Сәрсенбаевтың «қолынан іс келетін жергілікті азаматтар аз емес» дегені негізсіз емес екен.

Үйдің жанынан айлығы уақытылы, жұмыс уақыты кестеге сәйкес жақсы жұмыс табылғанына ризашылықты жалағаштықтар. Құрылыс басында қалаушы жұмысын атқарып жүрген жұмысшылардың бірі Дәурен Әшір де осындай риясыз ризашылығын білдірді. «Бұл жұмысты істегеніме бір ай болды. Жұмыс көңілден шығады. Ризамыз», — дейді ол

Учаске бастығы Қ.Жұмаділаев құры­лыс нысаны басын­дағы арнайы техни­каны жүргізушілер, дәнекершілер сынды мамандық иелерінен басқасы негізінен жалағаштықтар екенін айтып, құры­лыс нысанында сылақ, ішкі әрлеу жұмыстары жүргізіле бастағанда жұмыс­шылар саны арта түсетінін айтты. Яғни, алдағы уақытта «екі қолға бір күрек» іздеген жалағаш­тықтар қатары бұл нысан басында кө­бейе түсетін болады.

Құрылыс нысанының жабдықта­луымен қоса есептегенде құны 4 млрд. 119 мың теңгені құрайтынын жеткізді құрылыс нысанына иелік ететін аурухананың бас дәрігері Әсия Бекбергенова.

— 1998 жылы асар әдісімен салынған ескі ғимарат апаттық жағдайда тұр. Енді міне көптен күткен игілікке қол жеткізер күн алыс еместігіне қуанып жатырмыз. Аурухананың жаңа ғима­раты келер жылы пайдалануға бері­леді, — дейді бас дәрігер Әсия Мүсілім­қызы. Жаңа аурухана ғимараты іргелес тұрған 2015 жылы пайдалануға берілген 250 орындық емханамен бірге бір кешенді құрамақ. Әкімшілік емханада орналасады. 100 төсек орындық аурухана заман талабына сай жаңа жабдықтармен жабдықталып, халық қажетіне сай қызмет көрсететін болады.

«Келер жылы жалағаштықтар игілігіне жарқыраған жаңа аурухана беріледі» — деп  қуанышты лебіз білдірген еді бізбен сұхбат барысында аудан әкімі де. Аурухана кім-кімнің де барғысы келетін орын еместігі аян, дегенмен кейде кездейсоқ, кейде негізді себептермен оған қажеттілік болып жатады.

«Аурып тұрдым, аунап тұрдым» деп бұрынғылар айтатындай, жаңа ауруханадан дертіне дауа, жанға шипа тапсын дейміз барша емделуші. Оған жаңа ғимарат, жаңа заманауи жабдықтар, қажетті дәрі-дәрмек пен мейірлі жүрек, жылы алақан ақ халатты абзал жандар себепкер болары анық.

Ж.АЙМАҒАНБЕТОВА